Zerga eta tasak 1,5 puntu igotzea onartu dute plenoan
2024ko Zergen Ordenantza onartu dute. KPI baino txikiagoa izango da igoera, udalak gehiago ez igotzeko "esfortzua" eginda.
Zinegotzi guztiak izan ziren atzoko plenoan. 2024ko Zergen Ordenantza onartu zuten, atzo arratsean, ikasturteko lehen plenoan. Salbuespen batzuk kenduta, %1,5eko igoera izango da zerga eta petxa gehienetan.
Joana Mendiburu alkateak azaldu zuen igoeraren zergatia. Igoera hori ezartzeko irizpidea da aurreko urteetan kopuru bera aplikatu izan dela. “Iruditzen zaigu Oiartzungo familiek bestelako igoerak ere pairatzen dituztela, eta zergen igoera horrekin nahikoa dela”, azaldu zuen.
EAJk kontrako botoa eman zuen. Janire Mitxelena eledunaren esanetan, zergak “izozteko” garaia da, nahiz eta beraien “behin-betiko jarrera” ez den. Herritarrei “arnas eman” behar zaiela uste du Mitxelenak, eta inflazioa handitzen joango den arriskua dagoela esan zuen.
Gehitu zuenez, igoera “arrazoitu gabea” da, eta zeren arabera kalkulatu den azaltzeko eskatu zion udal gobernu taldeari.
Mendiburuk erantzun zionez, KPI baino baxuagoa izango da igoera, eta udalak ahalegina egin duela eta egingo duela igoera handiegia izan ez dadin. “Oraingo KPI %2,6en dago. Udalaren galera handiegia izan ez dadin igotzen dira zergak. Aurreko urteetan ahalegin handiago bat egin izan da. Oreka bilatu nahi izan dugu familien gastua ez handitzeko, eta udalaren gastuari eusteko”.
EH Bilduren aldeko botoekin atera zen aurrera ordenantza berria.
Gainontzeko puntuak
Gainontzeko puntuetan ez zen aparteko ezer gertatu. Kirol Sailaren planean aldaketa bat onartu zuten, ibilbidea hasi berri duen Katuxulo eskalada taldea diruz laguntzeko.
Gainera, menpekotasuna duten pertsonen laguntzaileek garraio publikoa doakoa izateko bozketa aho batez onartu zuten. Gipuzkoako garraio partzuergoko kide diren udalerri guztiek onartu behar dute.
