Zenbateraino dira eraginkorrak euskara sustatzeko saiakerak?
Galdetegia sortu dute merkataritza, ostalaritza eta zerbitzuetan euskararen presentzia handitzeko garatu diren estrategiak baloratzeko.
Saltokietan euskararen normalizazioa sustatzeko saiakerak zein emaitza ematen ari diren jakin nahi dute. 
Oarsoaldea Garapen Agentziak, eskualdeko udalekin elkarlanean, galdetegi bat jarri du martxan. Horren helburua da Oarsoaldeko hiri-ekonomiako sektoreetan (merkataritza, ostalaritza eta zerbitzuak) azken hamarkadetan euskara sustatzeko garatu diren estrategien balorazioa egitea.
Ebaluazioaren helburua bikoitza da: batetik, hiri espazioko merkataritza harremanen hizkuntza normalizazioaren alde egindako saiakeren emaitzak neurtzea; eta, horrekin, baita garatutako bestelako egitasmoen lorpen eta gabeziak azaleratzea ere. Balorazioa bide-orri gisa baliatuko dute eragileek, aurrera begirako ahaleginak “era emankorrenean” bideratzeko.
Ikertalde aholkularitza enpresa garatzen ari den azterketa prozesuak eskaintzaren (establezimenduak) eta eskariaren (kontsumitzaileak) iritziak jaso nahi ditu. Hartara, Oarsoaldeko herritar oro gonbidatu dute urriaren 27ra arte zabalik izango den galdetegi laburra erantzutera. Hemen klik eginda zabalduko da orri hori, eta gehienez ere 4 minutuko iraupena izango duela ohartarazi dute.
