Pasaitarrek doan eskuratu ahalko dute begirale titulua
Hilaren 10era arte da zabalik ikastaroan izena emateko epea. Aurreratutako 200 euroak bueltatuko dizkiete titulua eskuratzen duten pasaitarrei.
Udalekuetan lanean aritu ahalko dira titulua eskuratzen dutenak. 
Pasaiako Udalak aisialdiko begirale ikastaroa egiteko aukera eskainiko die Pasaiako gazteei. Ikastaroa Hezten elkarteak emango du, eta behin ikasturtea amaituta ikasleek Haur eta Gazteen Aisialdirako Begirale titulua lortuko dute, Eusko Jaurlaritzak homologaturikoa.
Interesdunek, gutxienez, 18 urte izan beharko dituzte, baina 2023-2024 ikasturtean 18 urte beteko dituztenak ere onartuko dituzte; alegia, 2005ean eta 2006an jaiotakoak. Saioak euskara hutsean emango dituzte, eta orotara 150 ordu teoriko eta 160 praktiko izango dira. Horiek egindakoan, memoria bat gauzatu beharko dute ikasleek titulua eskuratzeko.
Baldintzak eta informazio gehiago
Gutxieneko hizkuntza gaitasuna eskatuko diete ikasleei ikastaroa egin ahal izateko. Alegia, klaseak jarraitu eta memoria euskaraz entregatzeko gai izan beharko dute. Heztenek gaitasun hori ote duten garbi ez badu, elkarrizketa bat egingo zaie gazteei Euskara Zerbitzuan, gutxieneko gaitasun hori dutela egiaztatzeko.
Pasaitarrentzat dohainik izango da ikastaroa; baita pasaitar ez izan arren, bertako elkarteren edo udal zerbitzuren bateko kide direnenek ere ez dute ordaindu beharko. Hala ere, izena ematearekin batera 200 euro aurreratu beharko dituzte ikasleek, eta kopuru hori itzuliko zaie egiaztatzen bada saioetara agertu direla (ezingo da arrazoitu gabe 24 ordu baino gehiago huts egin) eta praktiken %60 Pasaian egin dutela. Gainerakoentzat, matrikula 465 eurokoa izango da.
Ikastaroan izena emateko epea hilaren 10era arte izango da zabalik. Matrikula Heztenen webgunearen bidez egin beharko da, eta ohartarazi dute taldea sortu ahal izateko gutxienez 14 eta gehienez 25 ikasle izan beharko direla. Azken kopuru hori baino gehiagok izena emango balute, lehentasuna izango dute Pasaian erroldatutakoek eta Pasaiako elkarte edo udal zerbitzuetako kideek. Informazio gehiagorako, deitu 943 27 00 33 zenbakira.
