Udalak bat egin du indarkeria matxista salatzeko mobilizazioarekin
Mugimendu feministak deituta, elkarretaratzea egingo dute gaur arratsaldean. Udalak "eskura dituen baliabide guztiak" jarri ditu emakumearen esku.
Udalak puntu morea jarri du udaletxeko balkoian. Herriko mugimendu feministak atzo jakinarazi zuenez, indarkeria matxista kasu bat izan zen Oiartzunen igande gauean. Gaur arratsalderako —asteartea— elkarretaratzea deitu du.
Done Eztebe plazan elkartuko dira, 18:30ean. Oiartzungo Feministen Asanbladaren deialdi horrekin bat egin du Oiartzungo Udalak.
Indarkeria pairatu behar izan duen emakumeari “babes osoa” erakutsi nahi izan dio udalak. “Oiartzungo Udalak gaitzespen gogorrena azaldu nahi du gure herrian gertatutako eraso sexistaren kontra, eta udalaren laguntza nahiz babes osoa adierazi nahi die erasoa pairatu duen emakumeari eta bere ingurukoei”, adierazi du udalak.
Horrez gain, jakinarazi dute erakundeak dituen “baliabide guztiak” jarri ditu emakumearen eskura. “Baita bere onera etortzeko prozesuan behar izan dezakeen laguntza guztia ere”, gaineratu dute.
Udalak, era berean, herritarrei gonbita egin die elkarretaratzean parte har dezaten. “Herritarrak indarkeria sexistaren kontra aktibatu eta jarrera argia erakustera animatu nahi ditu”.
Udaletxeko balkoian indarkeria matxistaren kontrako puntu morea jarri dute.
