Olaia Inziartek bere lanaren berri emango du igandean
Musikari baztandarrarekin solasaldi musikatua egingo dute Kantagiltzako hurrengo saioa, datorren igandean. Sarrerak salgai daude Landetxeko tabernan.
Olaia Inziarte musikaria. Kantagiltza solasaldi musikatuak eskaintzeko dinamikak datorren igandean —hilak 8— itxiko du aurtengo zikloa.
Laugarren saio horretarako Olaia Inziarte musikaria (Oronoz, 1999) gonbidatu dute. Gotzon Barandiaranek gidatuko du saioa, eta bere sorkuntza lanari buruzko galderak egingo dizkio.
Inziartek azalpenak kantekin tartekatuko ditu. Baztandarrak iaz publikatu zuen bere lehenengo lan luzea, Lehengo lepotikan burua. Badok.eus atariko berari buruzko fitxa kontsulta daiteke.
Saioa 18:00etan hasiko da, Arizmendieneko lorategian. Euria egingo balu, udaletxeko pleno aretoan izango litzateke zita.
Sarrerak salgai daudela jakinarazi dute. Landetxe eraikineko tabernan eskura daitezke, bost euroren truke.
Kantagiltzaren laugarren zikloa bukatzeko emanaldia izango da. Aurretik Anje Duhalde, Imanol Ubeda eta Maite Larburu izan dira bertan.
