Oiartzuarrek txapela jantzi dute kenpo kai txapelketan
Uxue Arozenak eta Alain Isasak elkarrekin aritutako proban lortu dute urrezko domina, eta Isasak katan lortu du bestea.
Alain Isasa eta Uxue Arozena, elkarrekin lortutako urrezko dominarekin. Honbu Kenpo Kai elkartekoak munduko txapeldun izan dira. Berdin du zein munduko txapelketatan irakurtzen duzun titular hori.
Aurtengoan ere balentria egin dute. Alain Isasa beteranoak eta Uxue Arozena gazteak —14 urte besterik ez ditu— munduko txapeldun izatea lortu dute.
Tunisiako Hammamet hirian jokatu dute Munduko Kenpo Kai Txapelketa, eta paper bikaina jokatu dute bi oiartzuarrek.
Juho modalitatean —binaka egiten den autodefentsa proba— urrezko domina lortu zuten Isasa eta Arozenak, elkarrekin egindako ariketetan.
Isasak, gainera, beste txapela bat lortu zuen: kata modalitatean. Lehenengo aldia izan da senior mailako gizonen kategorian lehiatu dutela, eta Isasa hori lortzeko asmoarekin joan zen Magrebeko herrialdera.
“Hori neukan buruan. Argi neukan horren bila joan behar nintzela”, azaldu dio Isasak HITZAri, Hammametetik. Gaineratu duenez, kanporaketa dezente jokatu dituzte Tunisiako hirian.
Sorpresak, etorkizunean
“Oso pozik” dagoela berretsi du Isasak, eta orain lasai erretira daitekeela txapelketatik. Hala ere, etorkizuna bermatuta dagoela uste du.
“Uxueren lehenengo txapelketa izateko, nahiko kontentu dago. Egia da borroketan ez zitzaizkiola gauzak nahi bezala atera, baina esperientzia handirik ez du oraindik”, esan du irakasle izan duen eta orain taldekide den Isasak.
“Gustura ibili zen, eta datozen urteei begira, sorpresa gehiago etor daitezke”, iragarri du.
