Mugimendu feminista: "Etxe eta kale seguruak behar ditugu"
Oiartzungo Feministen Asanbladak deituta, elkarretaratzea egin dute, indarkeria matxista kasua salatzeko. "Bizitza bizigarriak" aldarrikatu dituzte.
Igande eta astelehen artean izan zen indarkeria matxista kasua salatu zuten atzo. Oiartzungo Feministen Asanbladak deituta, elkarretaratzea egin zuten atzo arratsaldean Done Eztebe plazan. Herrian igandetik astelehenerako gauean izan zen indarkeria matxista kasua salatzera atera ziren kalera.
Haserre eta minduta daudela adierazi nahi izan zuten. Lehenik eta behin, elkartasuna adierazi zioten senideari, baita haren senide eta lagunei ere.
Indarkeria matxista salatu dute: “Iraintzen gaituzte, mespretxatzen gaituzte, jotzen gaituzte, hiltzen gaituzte. Iraindu, mespretxatu, jo, hil. Gaituzte. Gaituzue. Nazkatuta gaude. Nazkatuta gaude, behin eta berriro bizitza bizigarria nahi dugula esateaz, bizi nahi dugula esateaz eta aske bizi nahi dugula oihukatzeaz”.
Emakumeak “momentu oro” zapalduak direla gaineratu zuten, eta indarkeriak ez duela etenik izango matxismoarekin bukatu arte. “Sistema biolento batean bizi gara bai emakumeok, baita heteroarauan sartzen ez diren gorputzak ere. Haien bakeak gure guda izaten jarraitzen du oraindik”, zehaztu zuten.
“Feminismotik eragin behar dugu”
Elkarretaratzean egin zuten irakurketarekin jarraituz, gogorarazi zuten indarkeria matxista etxe barruan gertatzen denean kasu askotan haurrek ere pairatu behar dutela.
“Honekin bukatu beharra daukagu, nazkatuta gaudelako gure egunerokotasuna indarkeriaz bizitzeaz”, adierazi zuten.
Emakumeek beraien bizitza proiektuak aurrera eraman besterik ez dutela egin nahi aldarrikatu zuten. “Gizartearen egitura patriarkalak gure bizitzak arriskuan jarri besterik ez du egiten”, jarraitu zuten. Emakumeek sufritzen duten arren, indarkeria “gizarte osoaren arazo” dela seinalatu zuten.
“Horregatik gizartearen egituraren oinarriari feminismotik eragin behar diogu, eta gizonezkoek beren ekintzen larritasunaz jabetu behar dute”. Sistema iraultzeko tresna feminismotik “sareak” sortzea da mugimendu feministaren esanetan, “autodefentsaz”. Modu horretan gizartea “errotik” aldatzea da haien helburua.
“Bizitza bizigarrien aldeko apustu erradikal bat egiten dugu, indarkeriarik, arrazakeriarik eta gorrotorik gabekoa”. Irain, jipoi eta kolpeen aurrean “armatuta” daudela jakinarazi zuten, eta “aurrean” izango dituztela, “beti”.
