Correoseko garbitzaileek protesta egingo dute astelehenean
Greban dira urriaren 15era arte Correoseko garbitzaileak lau hilabetez ez dutelako diru saririk jaso. Manifestazioa egingo dute astelehenean 11:00etan Zumarditik abiatuta.
Correoseko garbiketako langileen protesta Irungo Zabaltza Plazako bulegoaren aurrean. Correoseko garbiketako azpikontratatutako SCT ACVA-Limpiezas J.Cordobako langileak greban dira astelehenaz geroztik euren eskubideen alde. Bizi duten egoera salatzeko protesta egingo dute astelehenean Errenteria-Oreretan. 10:30ean Correoseko bulego aurrean elkarretaratuko dira, eta 11:00etan, berriz, manifestazioa abiatuko da Zumarditik.
Greba hilaren 15era arte mantenduko dute. Arrazoia, lau hilabetez ez dutela dirusaririk jaso eta ez duela enpresak neurririk hartu egoerari irtenbide bat emateko: “Konpondu beharrean, uztaila, abuztua eta iraileko nominak ere ez dizkigu ordaindu enpresak, ezta aparteko paga ere. Egoerari irtenbidea ematen saiatu bagara ere, ez da ez elkarrizketa ezta negoziaziorik izan ez J. Cordoba garbiketa enpresarekin, ezta Correosekin ere”.
Euren eskubideen aldeko borrokan jarraitzeko prest agertu dira langileak, “kasurik egiten ez badigute ere”.
Egoeraren “larritasuna” aintzat hartzeko eskatu diote langileek Correoseri, “gure soldatak ordaintzera derrigortu dezan enpresa. Ezinezkoa da 24 milioi eurotik gora mugitzen dituen kontratu publiko baten testuinguruan, langileak ordainsaririk gabe izatea, Correos ordaintzen ari denean garbiketa enpresari. Diru publikoa da eta ardurak eskatzen ditugu”.
Borrokan jarraitzeko asmo garbia azaldu dute langileek egoera konpondu ezean. Eskaera zehatzak egin dituzte: Correos langileekin biltzea nahi dute, “bera delako egoera honen arduradun bakarra”; langileei zor zaizkien soldatak ordaintzera derrigortu behar du Correosek azpikontratatutako enpresa; eta azkenik, J. Cordobarekin duen kontratua eteteko eskatu dute lan baldintza duinak bermatuko dituen deialdi berria egiteko kontratazio publikorako araudia ezarrita.
Correosek bere bulegoen garbiketa zerbitzua bere gain hartzeko ere eskatu dute: “Correosek internalizatu egin behar du zerbitzua diru publikotik onurak atera nahi dituzten enpresa piratei bazter eginda. Enpresa horiek zerbitzuaren eta langileen baldintzen prekarizaziotik ateratzen dituzte etekinak”.
