84 etxe hornitzeko adina argindar sortu dute Lizeoko plakek udan
Ikastetxearen teilatuko eguzki plakek 25.000 kWh pasa jaso ditu uztail eta abuztuan zehar. 276 dira Goienerrek ezarritako plakak.
Eraikin nagusiko teilatuan 276 plaka fotovoltaiko daude. 
Goiener energia berriztagarrien sorkuntza eta kontsumo kooperatibak Pasaia-Lezo Lizeoko teilatuan jarrita dituen eguzki plakek lanean jarraitu dute ikastola udako oporrengatik itxita egon den tartean. Ikastetxeak emandako datuen arabera, eta eguraldia erabat eguzkitsua izan ez den arren, egitura fotovoltaikoak 25.000 kWh pasa jaso ditu uztail eta abuztuan zehar. Zehatzago, uztailean 13.561,7 kWh eta abuztuan 11.821,3 kWh.
Bestela esanda, bi hilabete horietan zehar, denbora epe berean 84 etxebizitza hornitzeko adina argindar sortu da ikastetxearen teilatutik (ohiko etxebizitza batean, bataz beste, hileko kontsumoa 150 kWh da). Eraikin nagusiko teilatuan 276 plaka fotovoltaiko ezarri zituen Goienerrek.
Lizeoak eta kooperatibak sinatutako hitzarmenaren arabera, Donibaneko eraikinean sorturiko energia hori Goienerren bazkideak elektrizitatez hornitzeko erabiliko dira; horien artean daude ikastetxearen eraikinak. Lizeoak, bestalde, lehen hamar urteetan, eta eguzki plaken inbertsioa amortizazioa lortu arte, %20ko deskontua izango du elektrizitate kontsumo fakturan. Hortik aurrera %60ra pasako da deskontua.
