Albaolak San Juan Kanadara bidean proiektua aurkeztu du Madrilen
Kanadak Espainian duen enbaxadaren egoitzan izan dira faktoriako kideak, bai eta ordezkaritza politiko zabala ere.
Ezker-eskuin, Eider Mendoza, Zulema Aragones, Xabier Agote eta Wendy Drukier. 
Gaur goizean Albaolak San Juan Kanadara bidean proiektua aurkeztu du Madrilen, Kanadak Espainian duen enbaxadaren egoitzan, Wendy Drukier enbaxadorea anfitrioi izanik. Enbaxadore kargua hartu berritan faktoria bisitatu zuela kontatu die bertaratutakoei. Orduan ikusi ahal izan zuen hark 16. mendeko euskal baleontziaren erreplika.
Drukierren irekieraren ondoren Zulema Aragones, ekitaldiaren antolatzaile den Kanada-Espainia Merkataritza Ganberako presidenteak, hartu du hitza. Horrelako proiektuak babesteak duen garrantzia nabarmendu du, “kulturen arteko loturak sortu eta eraldatzeko duten ahalmenagatik”. Jarraian mitzatu da Xabier Agote Albaolako presidente eta fundatzailea.
Agotek UNESCOk babestutako San Juan baleontzi transozeanikoaren erreplika eraikitzeko proiektua azaldu du. San Juanaren ibilbideko mugarri nagusiak gogorarazi ditu, Parks Canada urpeko arkeologiako gobernu agentziak aurkitu zuenetik, une honetan munduan bakarra den galeoi hori eraikitzeko azken faseetara arte.
Erakundeetako ordezkarien artean izan dira, besteak beste, Aintzane Taberna Pasaiako alkateordea, Eider Mendoza Gipuzkoako Diputatu Nagusia, Denis Itxaso Espainiako Gobernuaren ordezkaria EAEn, edo Juan Aguado Eusko Jaurlaritzaren ordezkaria Madrilen. Era berean, nazioarteko enpresen ordezkaritza zabala izan da ekitaldian, baita hainbat kultur eragile ere.
