Kiroldegiko prezio murriztua eskatzeko epea zabaldu dute
Azaroaren 10era arte egin dezakete eskaera hainbat baldintza betetzen dituztenek. Ezgaitasun altua dutenentzat, doakoa.
2024 urteko Elorsoro kiroldegiko kuota murriztua eskatzeko epea zabalik dagoela jakinarazi du Oiartzungo Udalak. 2024ko abonuari dagokion arren, 2023ko azaroaren 10a izango da eskaera egiteko azken eguna.
Prezio orokorraren gaineko %40ko hobaria izango dute bizikidetza unitate bakoitzerako zehaztu duten errenta kopurura iristen ez diren bazkideek. Horiek udalaren webguneko Iragarki Taulan kontsulta daitezke.
Aurreko urteetan prezio murriztuak izan dituzten bazkideek ere egin behar dute eskaera berriz eskatu nahi badute deskontua (urtero egin behar da).
Honakoak dira ohiko tarifa eta prezioak, hileko:
- Familien ohiko kuota: 40,44 euro.
- Familien kuota murriztua: 24,23 euro.
- Familia ugarien edo guraso bakarreko familien ohiko kuota: 28,31 euro.
- Familia ugarien edo guraso bakarreko familien kuota murriztua hileko: 16,98 euro.
- Helduen banakako ohiko kuota: 24,12 euro.
- Helduen banakako kuota murriztua: 14,48 euro.
- Gazteen (6-15 urte) banakako ohiko kuota: 14,84 euro.
- Gazteen (6-15 urte) banakako kuota murriztua: 8,87 euro.
Ezgaitasunen bat dutenek, doan
Udalak jakinarazi duenez, %33 edo gehiagoko ezgaitasunak dutenek banakako kuota doan izango dute.
Familia abonuko bikoteko bi kideek ezgaitasuna dutenean ere ez dute tarifa ordaindu beharko. Familiako bideren batek desgaitasuna duen kasuetan, familia-unitatea lagun bat gehiago gisa kontabilizatu eta horren araberako baremoak aplikatuko dira.
Eskaerak, udaletxean
Eskaera orria udalaren webguneko Tramiteak atalean aurki daitekeela jakinarazi dute.
Eskaera orriaz gain familia liburua (familia ugarien edo guraso bakarreko familien kasuan soilik) edo ezgaitasun ziurtagiria aurkeztu behar da, hala dagokionean.
Gainontzeko baldintzak betetzen direla ziurtatzeko ez da dokumentaziorik aurkeztu behar; eskatzaileak kontrakorik adierazten ez badu udalak eskuratuko du informazioa.
