Gazteak emantzipatzeko laguntzak emango ditu udalak
Urriaren 13an, epea irekiko da 18 eta 35 urte arteko Errenteriako gazteek diru laguntzak jaso ditzaten.
Aurten ere, Errenteriako Udalak gazteen emantzipazioaren gaiari helduko dio. Hori horrela, diru laguntzak eskainiko dituzte, aurtengo ikasturtean zehar aurretik alokairu erregimenean etxebizitza hartzeak gazteei eragin dizkien gastuei aurre egiteko. Aitor Zorzano Gazteria zinegotziak eta Bea Martin Gazteria saileko dinamizatzaileak agerraldia egin dute Iztietan, eta diru laguntzon nondik norakoak azaldu dituzte.
Baldintzak
Laguntzak apirilaren 11tik Errenterian erroldatuta dauden gazteei zuzendu zaizkie (hain zuzen ere, duela sei hilabete argitaratu baitzen laguntzaren iragarkia Gipuzkoako Aldizkari Ofizialean): 18 eta 35 urte artekoei, edo 18 urte beteta ez eduki arren, emantzipatuta bizi direnei. Beste baldintzetako bat onuradunek alokairu erregimenean bizi behar dutela da.
Bukatzeko, elkarbizitza unitatearen diru sarrerei dagokien baldintza ezarri dute. Izan ere, diruz lagunduko dituzte 2023an zehar etxebizitza berrian sartu direnei, baita urtarrila eta abendua artean ordaindutako hileko errentarekin zailtasunak izan dituztenei ere. Bada, elkarbizitza unitatearen diru sarrerak 3.000 euro gordinetik gorakoak izan behar dute bi kasuetan; eta kide bakarreko unitateetan, urteko 30.000 euro gordineko diru sarrerak, gehienez ere. Elkarbizitza unitateak bi kide edo gehiago baditu, urteroko diru sarrerek ezingo dute 35.000 euro gordinen langa gainditu.
Eskaera
Laguntza eskatzeko epea urriaren 13an irekiko da, eta azaroaren 11n itxiko. Eskabidea (inprimakiak esteka honetan egongo dira eskuragarri) ZU! Zure Udala arreta zerbitzuan aurkeztu behar da. ZU! zerbitzuaren ordutegia hurrengoa da:
- Astelehenetan: 07:30etik 14:00etara.
- Astearte eta ostegunetan: 07:30etik 19:00etara.
- Asteazken eta ostiraletan: 07:30etik 15:00etara.
Ezinbestekoa izango da inprimakiak behar bezala beteta aurkeztea, agiri osagarriekin batera erregistratzeko.
