LABek topaketa egin du, bere berrikuntza prozesua "hauspotzeko"
Sindikatuko 200 kide inguru elkartu dira Landetxen, Topaketa Sindikaletan. Arrazakeriaren kontrako borroka, ardatz.
200 bat sindikalista elkartu ziren Landetxen [Arg.: @LABsindikatua]. LAB sindikatuko 200 bat kidek batzarra egin zuten atzo —osteguna, hilak 5— Landetxe eraikineko auditorioan, Topaketa Sindikalak izenpean.
Euskal sindikalismoaren “berrikuntza” prozesuari “hauspoa” emateko xedez elkartu ziren bertan. Nabarmendu dutenez, LAB sindikatu “antiarrazista” bilakatzeko erabakia hartu zuten iazko kongresuan, independentismo eta feminismoan egin bezala.
Aurten barne plan eta idazkaritza antiarrazista sortu dituztela gogorarazi dute, eta arlo horretan lau direla LABen plangintzaren ardatzak. Honakoak dira:
- Kontzientzia sindikal antiarrazista sortzea.
- Antolaketa eta funtzionamendua berrikustea.
- Langile migratu eta arrazializatuen errealitateari erantzungo dion ekintza sozio-sindikal antiarrazista sustatzea.
- Euskal Herrian bizi diren pertsona guztiei eskubide guztiak bermatzeko aldaketa politikoen alde egitea.
Sindikalismo antiarrazista izan zuten hizpide lau hizlari hauek: Lucia Mbomio (Madril) kazetari eta ekintzaile antirrazista; Marra Junior (Euskal Herria) Bilboko Mugimendu Panafrikarreko kidea; Pastora Filigrana (Andaluzia) abokatua eta sindikalista, eta Valery Alzaga (AEB) antolatzaile sindikala eta migranteen eskubideen aldeko ekintzailea.
Hori goizean izan zen. Arratsaldean lau tailer egin zituzten, beste hainbeste gairi buruzkoak: “Krisi ekosozialari lantokietatik aurre egiteko gakoak; Greba Feminista Orokorra; Ekintza Sindikalerako borroka moldeak, eta borroka sindikalen komunikazio estrategia.
