Ilargiren 'Txotxongilo', bideoklipean
Musikari lezoarrak 'Beldurrarekin dantzan' diskoko 'Txotxongilo' abestiaren bideoklipa egin du. Igandean, zuzenean ariko da Dabadaban.
Ilargi abeslari eta musikagile lezoarrak Txotxongilo abestiaren bideoklipa egin du, eta gaur estreinatu du. Behean ikus daiteke osorik. 2022an kaleratutako Beldurrarekin dantzan diskoaren barruko kanta da Txotxongilo. Istorio sakoneko singlea da, bideokliparen gordintasunean dasta daitekeena. Ilargi Arrizabalagaren bigarren diskoko abestia da Txotxongilo; lehen diskoa Killasisa (2021) izan zen.
Bidekoliparen protagonistak Gerri Cruz eta Ilargi Arrizabalaga bera dira. Alde teknikoan, Josu Minguez, Itxaso Vicente, Asier Serran, Sendoa Zubizarreta eta June Oskoz izan dira. Abestia, Beldurrarekin dantzan diskoa bezala, Haritz Harreguyren estudioan ekoitzia izan da Pablo Novoaren konponketa eta Claudia, Bellota, Enara eta Gerriren koruekin.
Singleak, Ilargik jakinarazi duenez, antzerki zuzendari baten istorioa kontatzen du. “Zuzendari horrek, bere botere posizioa erabiliz bere esku dauden aktoreetaz abusatzen du. Horren aurrean, aktoreek elkartzea erabaki eta bere jarrera salatzen dute. Gertukoek aktoreen alde egin ordez, zuzendariaren alde egiten dute. Hala ere, aktoreentzat elkartzea, salatzea eta egoera horretatik irtetea garaipen bat da”. Izan ere, Dantzertin Arte Dramatikokom ikasketak egin ditu Ilargik, eta abestia han bizi izandako egoera erreal batean dago oinarrituta.
Abesti hori, eta sortzaile lezoarraren guztiak zuzenean entzuteko aukera berria hilaren 8an (igandean) izango da. Donostiako Dabadaba aretoan kontzertua emango du, 19:00etan hasita, Astelehen Goizak taldearekin batera. Bertarako sarrera eskuratzeko klik egin hemen.
