Lezoko PSE-EE asebete Ijurkoko magala indartzen ari direlako
Hasi berri diren lanek 1,6 milioiko aurrekontua dute eta zortzi hilabetean dira bukatzekoak. Ondoren, anbulatorioa eta alokairuzko etxebizitzak dira han egitekoak.
Ijurkoko magala egonkortzeko lanak hasi ziren duela hainbat egun. Eusko Jaurlaritzako Lurralde Planifikazio, Etxebizitza eta Garraio departamentuaren ekimenez ari dira egiten lan horiek. Horren harira, Lezoko PSE-EE pozik azaldu da obrekin: “Sozialisten konpromisoari esker, Lezok egungo baino hiru aldiz handiagoa den anbulatorioa izango du, eta herriak alokairuzko etxebizitzetan duen gabeziari erantzuna emango zaio”. Jaurlaritzaren departamentu horren ardura PSE-EErena da. Magal alboko orubean herriko anbulatorio berria eta alokairuzko zuzkidurazko 52 etxebizitza egitea da asmoa. Iazko abenduan izandako luiziak, ordea, kolokan jarri zuen egitasmoa. Bertako bizilagunen artean kezka eragin zuen gertakariak.
Jaizkibel hiribidearen eta Aralar kalearen artean dago egonkortzen ari diren orubearen magala. Lezoko PSE-EEk jakinarazi du egonkortze lanek 1,6 milioi euroko aurrekontua dutela, eta zortzi hilabetean direla bukatzekoak. Magala eusteko lanen ondoren “berehala” hasiko dira anbulatorioa eta etxebizitzak egiteko obrak, sozialisten arabera: horien aurrekontua 5,6 milioi eurokoa da.
Herriko PSE-EEren udal eledun Joxean Sanchezentzat mazela hori indartzea “sekulako albistea” da: “Lan horiek eginda erabateko egonkortasuna izango du eremuak, eta horrela, abenduko luiziagatik ondoko etxebizitzetako bizilagunen artean sortu zen kezka arinduko da”. Aralar kaleko 3 eta 5 atarietako bizilagunek zuzen-zuzenean jasan zituzten lur-jausiaren ondorioak.
Anbulatorio berriak “lezoarren osasun asistentzia” hobetuko duela nabarmendu dute, eta etxebizitzekin “lezoar gazteen emantzipaziorako erraztasunak” bermatuko direla azaldu du Joxean Sanchezek, “euren beharren araberako lehen etxebizitza eskuragarri eta egokia izango dute”.
