Zerga ordenantzak onartu ditu udalbatzak
EH Bilduren aldeko bozekin, gobernu taldearen proposamena onartu zen irailaren 28ko Osoko Bilkuran. PSE-EEren bi ekarpen onartu zituzten ere.
Iragan irailaren 28an, Lezoko Udal Gobernu Taldeak zerga ordenantzak eguneratzeko proposamena aurkeztu zuen, datorren urteari begira. Udalbatzak proposamena onartu zuen, alde bozkatu zutelarik EH Bilduren zazpi zinegotziek eta kontra EAJren bostek. PSE-EE abstenitu egin zen.
Gobernu taldearen arabera, zerbitzu publikoak “unibertsalak” dira, eta “gizarte desberdintasunak gutxitzeko” balio dute. Horretarako, ordea, ezinbestekotzat jo du “zerbitzu publiko egokiak eskaintzeko, eta politika publikoak garatzeko beharrezko baliabideak eskuratzea”; bai eta zergen progresibitatea bermatzea ere, gehien dutenek gehiago eman dezaten. Helburu horiekin, udal gobernuak errenta mailan oinarritutako hobari sistema onartu du.
EAJk proposamenari ekarpenik ez zion egin, bai ordea PSE-EEren udal taldeak: hamabost, hain zuzen ere. Horien artetik zerga ordenantzak idazkera inklusibo eta ez sexistaren arabera moldatzen joatea onartu zen; hainbat etxebizitzen obren zergan % 50eko hobaria aplikatzearekin batera, desgaitasuna duten edo 70 urtetik gorako herritarren irisgarritasun- eta bizigarritasun-baldintzak errazteko nahiarekin.
Hartutako erabakien artean, udal gobernuak beste bat azpimarratu du: Ondasun Higiezinen gaineko Zergaren % 1,6ko igoera bertan behera utzi dute. Izan ere, herritarrek ordaindu beharrekoa zehazteko igoera horri “katastroaren balioa handitzea gehitu behar zaiola” adierazi dute. Egun, igoera % 2,5 ingurukoa izango dela aurreikusten da, eta hor dago aldez aurretik proposatutakoa atzera botatzearen arrazoia.
Bukatzeko, EH Bilduk adierazi du etxe hutsak merkaturatzea errazteko, bidea abiarazi dutela etxebizitzaren funtzio soziala betetzeko.
