Alex Bargallo judo irakasleak jasoko du Kirol Saria
VIII. Kirol Saria jasoko du irakasleak. Duela lau hamarkada hasi zen judo eskolak ematen, eta Elizaldetarrak taldea sortu zuen.
Bargallok 40 urte daramatza judoa irakasten. Aurtengo Kirol Saria jasoko duenaren berri eman dute gaur: Alex Bargallo izango da. Judo iraksle lanetan daramatza 40 urte.
Aurten 23 proposamen jaso dituzte, eta hautagaien artean zegoen Alex Bargallo. UKABek erabaki du Bargallori ematea. Herriko kirol elkarteetako ordezkariak eta udala biltzen dituen kirol aholku batzordea da UKAB.
Azken 40 urteetan Oiartzunen judoa irakasteko eta zaletasuna zabaltzeko egindako lanagatik aitortza egitea erabaki dute.
Elizaldetarrak-en sorrera
UKABen erabakiaren berri eman du Oiartzungo Udalak. Nabarmendu dutenez, Bargallo duela 40 urte hasi zen judo eskolak ematen, Elizalde ikastetxeko guraso elkarteak hala proposatuta.
Lehenengo ikasturte hartan 50 bat gaztek eman zuten izena. “Haurtzaro ikastolak ere planteatu zuen judoa ematea eta bi ikastetxeetako ikasleak jasotzen hasi zen elkartea”, gaineratu du udalak.
Horrela, judo eskola horretatik 2.250 bat lagun pasatu dira azken lau hamarkadetan, eta gaur 160 kide ditu Elizaldetarrak-ek.
Judoaren bidez hezkuntza fisikoan eragitea izan da Bargalloren helburua. “Ehunka izan dira 40 urte hauetan zehar bere lanari esker judoa ikasi duten oiartzuarrak. Jakin du judoarekiko duen pasioa denei kutsatzen”, adierazi dute.
Ibilbidean egindako lanarengatik omendu nahi dute Oiartzungo Udalak eta elkarteek.
Hilaren 27a, ekitaldia
Kirol Astea hil honen bukaeran egingo dute, eta horren barruan egingo den ekitaldi batean jaso du saria Bargallok. Hilaren 27an izango da, Landetxeko auditorioan, 19:00etan hasita.
Alex Bargallo omentzeko ekitaldia irekia izango dela iragarri dute, baina edukiera mugatua denez, gonbidapena hartzea aholkatu du udalak.
Gonbidapenak udalaren sarreren webgunean eskura daitezke.
