Kirol instalazioetan inbertsioak egin ditu udalak
Makinak, ikastaroetako hainbat materiala erosi eta argiteriaren hobekuntza egin du udalak.
Fanderiako igerilekua itxita izango da hilaren 10etik 23ra biak barne. Hainbat inbertsio egin ditu udalak kirol instalazioak eta zerbitzua hobetzeko. Hala, Galtzarabordako kiroldegiko fitness zentrorako hainbat tresna erosi ditu, erabilienak diren makinak berrizte aldera. Zehazki, hankak eta belaunak lantzeko mikro power makina bat, beheko enborra lantzeko erabiltzen den haka makina bat, goiko enborra indartzeko arraun makina bertikala, eta trizepsa luzatzeko berariazko makina bat. Guztira 14.200 euroko inbertsioa egin du.
Fanderiako kirol gunean berriz, Futbol 11 zelaiko hamasei fokuen ordez Led argiteria jarri du, “instalazioaren argi eraginkortasuna hobetzeaz gain, energia arloan aurrezpen handia lortzeko”. Jarri dituzten argiek gainera, erregulazio sistema programagarri espezifikoa dute.
Inbertsioa ez da horretara mugatu. Fanderiako zein Galtzarabordako kiroldegietako igerilekuetan zein aretoetan egiten diren ikastaroetarako materiala erosi du. Azken horretara, 5.000 euroko inbertsioa egin du udalak.
