Arrakastatsua izan da
Larunbatean 300 herritar hurbildu ziren Lezoko Antzerki Testu Laburren I. Lehiaketaren finaleko jaialdi ekitaldira. Ikusleek Xabier Payaren 'Erga tibo pum' lana erabaki zuten garaile.
![](https://oarsoaldea.hitza.eus/site/files/2023/10/lezoko-i-antzerki-testu-laburren-lehiaketa-finala.jpg)
Larunbatean, Lezoko I. Antzerki Testu Laburren lehiaketaren finala ospatu zuten. Udalak eta Hika Teatro konpainiak antolatu dute lehiaketa, elkarlanean. Lezoarrek Xabier Paya bertsolari getxoarra aukeratu zuten garaile, “Erga tibo pum” lana sarituta.
Jaialdia
Antolatzaileek finalari jaialdi kutsua eman zioten, sortzaile eta herritarren artean larunbat arratsalde gozoa pasa asmoz. Aurretik, arratsaldeko 15:30ean, finaleko epaile Ander Lipus, Kepa Errasti eta Agurtzane Intxaurraga aktoreekin (Eneritz Artetxe, Maryse Urruti, Koldo Olabarri, Idoia Tapia, Kimetz Etxabe eta Raquel Salinas) bildu ziren. Orduan, aktoreek binaka zein testu irakurriko zuten zozketatu eta ia bi orduz irakurketa prestatzeko denbora izan zuten.
DJ La Bravaren saioak herritarrak Herri Eskolara erakarri zuten, eta giro aparta sortu zen. “Aurreikuspen guztiak gainditu ziren. Eguraldi oso ona egin zuen, eta gure asmoa jendea erakartzea izanik, 300 bat lagun hurbildu ziren jaialdira” adierazi du Xanti Val udaleko kultur teknikariak. Beranduxeago, Hatxe musikari oreretarraren zuzeneko eta inprobisatutako musika lagun, 20:00etan sei finalisten obren irakurketa dramatizatuei ekin zieten, jende andanaren aurrean. Etenaldia egin zuten lehen hiru lanak irakurrita. Kultur teknikariak adierazi moduan, ingurua zertxobait hustu zen (herritarrak afari bila mugitu baitziren), baina hasierako urduritasuna laster desagertu zen: “ia herritar guztiak itzuli ziren, eta jende askok bozkatu zuen” Bukaeran, “demokraziaren epaileak”, herritarrek, Xabier Payaren lana aukeratu zuten saioko irabazle. 1.000 euroko saria jaso zuen ordainetan.
Prozesua
Lehiaketan parte hartzeko epea irailaren 14an itxi zuten. Lehen edizio honetan 18 dramaturgok aurkeztu zituzten haien sorkuntzak, eta maila handiko epai mahaiak aukeratu zituen sei finalistak. Hala, Lierni Fresnedo antzerkigile lezoarrak, Kepa Arresti dramaturgo eta aktoreak, nahiz Agurtzane Intxaurraga dramaturgo eta Hika Teatro konpainiako zuzendariak osatutako epaimahaiak Garazi Ezeiza, Oier Guillan, Hegoa Alvarez, Iñaki Cid eta Ainhoa Mariezkurrenaren obrak aukeratu zituen larunbaterako, Paya irabazlearenarekin batera.
Valek parte hartzaile nahiz ikusleen adina nabarmendu du: “gure asmoetako bat bereziki jende gaztea erakartzea zen, normalenean antzerki edo arte eszenikoekin lotura handiegia ez duen sektorea delako. Jaira hurbildutako jendearen artean, asko oso gazteak ziren”. Ikusle eta parte hartzaileen adinaz gain, epaile, parte hartzaile zein aurkezleen maila azpimarratu dute antolatzaileek.