Pilota Eskolan izena emateko epea zabalik
Entrenamenduak astelehenetik ostegunera egiten dituzte Agustina Otaola pilotalekuan, Esku Pilota eta Pala modalitateetan.
Pilota Eskolako kideak Agustina Otaola pilotalekuan. argazkia: EPLE Errenteriako Pilotaren Lagunen Elkarteak jakinarazi duenez, oraindik ere aukera dute txikienek pilota eskolan aritzeko izena emateko. Entrenamenduak astelehenetik ostegunera egiten dituzte Agustina Otaola pilotalekuan, Esku Pilota eta Pala modalitateetan.
Pilota Eskolaren arduradunak pozik azaldu dira orain arte izena eman dutenen kopuruarekin, baina hura handitzea jarri dute helburu: «Une honetan 54 ikasle ari dira kirol polit honekin gozatzen Fanderiako frontoian, baina klubak, kopuru hori ahalik eta gehien handitzea nahi du».
Esku Pilotan 2012-2015 urteen artean jaiotako haur eta gaztetxoek eman dezakete izena; Palan berriz, 2008 eta 2013 artean jaiotakoek.
Ordutegiei, adinei, entrenamendu egunei edota bestelakoen gaineko zalantzak argitzeko telefono zenbaki bat jarri du EPLEk interesdunen eskura. Honakoa da: 680 71 94 22. Whatsapp bidez ere egin daitezke kontsulta horiek zenbaki berera mezua bidalita.
EPLEk pilota edo pala gustuko duten haur eta gazteak Pilota Eskolan parte hartzera animatu ditu: «Entrenamendu orduetan kirol arropa jantzi eta Agustina Otaola pilotalekura gerturatu daitezke probatzera inolako konpromisorik gabe».
