Urtabe prozesuaren azken saio parte hartzailea, hilaren 28an
10:00etatik 13:00etara izango da batzarra, Haurtzaro Ikastolako jantokian. Datozen bost urteetarako lehentasunak ezartzen saiatuko dira.
Euskaraz Urtabe prozesuko gaikako batzarretako baten irudia da honakoa. Euskaraz Urtabe prozesua etapak betetzen ari da. Oiartzungo Udalaren Euskararen Plan Estrategikoa berritzeko egitasmoaren azken saio parte hartzailea hilaren 28an (larunbata) egingo dute, 10:00etatik 13:00etara, Haurtzaro Ikastolako jantokian.
Bi arlo nagusiren gaineko gogoeta egingo dute azken parte hartze saio horretan: orain arte osatu den Oiartzungo euskararen diagnostikotik abiatuta, hurrengo bost urteetarako plangintzarako lehentasunak hitzartzen saiatzea; eta euskararen sustapenean eragiteko ekintza proposamenak biltzea. Horiek guztiek, batzarrera aterako den galdera bat erantzuteko balio behar dute: “Nola lortu Oiartzungo helduek eta gazteek euskaraz gehiago egitea”.
Deialdi zabala da hilaren 28koa, herritar orori zuzendutakoa. Aurrez, baina, bertan parte hartzeko izena eman behar da. Hemen klik egin izen emate orrira joateko.
Saioa bitartean haurrentzat zaintza zerbitzua izango da. Aldi berean, mokadutxoa banatuko dutela iragarri dute.
