Pentsatzen jarriko dira haurrak
Filosofiaren Plazako saioak antolatu dituzte hirugarrenez 9-12 urte arteko haurrei begira.
Aurreko ekitaldi bateko argazkia. Argazkia: Herri Bizia Filosofia Plazaren saioak hasiko dituzte berriro Lekuon Fabrikan. Azaroaren 3an hasita, hilean behin izango dira 17:30etik 19:30era 9 eta 12 urte arteko haurrei begira. Helburua haurrak sormenaz gozatu, harekin jolastu, ikertu eta haren inguruan pentsatzen jartzea da.
Hirugarren ekitaldia du honakoa Filosofiaren plazak. Haurrek ortzaile sena garatzeko testuingurua, denbora eta espazioa da Filosofiaren Plaza, eta helburu horrekin sortu zuten pentsamendu filosofikoa eta artea bat egiten dituen proiektua iazko udaberrian.
Bi orduko saioan, artista batekin elkartuko dira parte hartzaileak, baita haur filosofia bideratzaile batekin ere.
Antzerkia, musika, margolaritza, jostailuen diseinua, dantza, literatura eta bestelako esparruak inguratzen dituzten prozesuak, aurrekariak, zergatiak eta produktuak aurkeztuko dizkiete parte hartzaileei. Aurreko bi edizioetan, Ainara Gurrutxaga, Urko Redondo, Ibai Maritxalar, Eva Díaz de Isla, Joxemari Carrere, Idoia Hernandez Hatxe, Xabier Obeso, Ander Fernandez, Alain Maya, Ibon Huarte eta Gema Ines Murillo izan ziren sortzaile parte-hartzaileak. Aurten, beste izen batzuk gehituko zaizkio zerrenda horri..
Artisten lanetik abiatuko dira saioak eta, ondoren, haurrak protagonista bihurtuko dira elkarrizketa filosofikoan aritzeko. Xabi Salaberria eta Eva Domingo Jakinmin Praktika Filosofikoen elkarteko kideak izango dira gidari, haurrek kreatibitatearen inguruko hausnarketa egin dezaten. Saioaren bigarren zatian, berriz, haurrek sortzeko aukera izango dute.
Doakoak dira saioak, baina parte hartzeko izena eman behar da. Horretarako egin klik hemen.
