[Argazkiak] Palestinari, babes erakustaldia
Palestinari elkartasuna erakutsi diote gaur arratsaldean hamarnaka herritarrek. Kontseilu Sozialistak deituta, elkarretaratzea egin dute Iztieta auzoko Diputazio plazan.
Kontseilu sozialistak deituta Palestinaren aldeko elkarretaratzea egin dute. Palestinari elkartasuna erakutsi diote gaur arratsaldean hamarnaka herritarrek. Kontseilu Sozialistak deituta, elkarretaratzea egin dute Iztieta auzoko Diputazio plazan. Bi pankartaren ingurura bildu dira bertaratutakoak Genozidioari eta Apartheidari Stop Palestina libre leloa irakur zitekeen batean, eta Israelgo Estatua hiltzailea. Palestinarekin elkartasuna leloa bestean.
Bildutakoen helburua Israelen jarrera “genozida” salatzea izan da; baina baita palestinarrei elkartasuna adieraztea. 19:00etan puntuan hasi dute elkarretaratzea “Israel hiltzaile” eta “Palestina aurrera” oihu artean.
Gogor salatu du kontseiluak Israelgo Estatu “kriminala”, bere oinarriak “okupazioan eta palestinarren zapalketan” dituelako. Ez da horretara mugatu, izan ere, “jarrera kriminal” horrekin bat egitea egotzi die mendebaldeko estatuei ere “Israelekiko duten izaera kolaboratzaileagatik”. Horren aterabide, “dominazio eta zapalkuntza guztien aurka” nazioartean sozialismoaren aldeko indar politikoa berrantolatzeko lanean jarraitzera deitu du; hori baita antolakundearen iritzirako “herri langileen askatasuna eta gerrarik gabeko jendarte baten oinarriak eraikitzeko bermea”.
Hamarkada luzeetako egoera larria, azken egunetan nabarmen larritu dela salatu du Kontseilu Sozialistak.
Israelen “ideologia sionista supremazista” salatu du kontseiluak, baita eskuineko alderdi parlamentarioek Israeli babesa adierazi izana ere. Ez hori bakarrik, ezkerreko alderdien epelkeria ere nabarmen jarri du, “gatazkaren konponketarako egin duten elkarbizitzarako eta elkarrizketarako deia, palestinarrei zapaltzaileen bakea inposatzea delako. Bakezaletasunez mozorroturik adierazpen horiek, Israelgo erregimena zuritu, zapalkuntza egoera neutralizatu, eta palestinarren erresistentziaren kriminalizazioa bultzatzen dute”.
