Balea txalupak ardatz, Albaolaren nazioarteko sinposioan
Gaur goizean inauguratu dute bi eguneko jardunaldia. Islandiarrekin lotura berezia izango du faktoriak aurrerantzean.
Bi eguneko sinposioa izango da. Gaur goizean iritsi dira parte hartzaileak Albaolara. 
Gaur goizean, Albaola faktorian, The Basque Whaleboat At The Origin Of Industrial Whaling nazioarteko sinposioaren lehen egunari ekin diote.
Ekitaldi horrek Basque izeneko proiektuko bazkide eta kolaboratzaileen ordezkaritza islandiarra, gaian adituak diren hizlariak eta erakundeen ordezkaritza bildu ditu. Artean, Teo Alberro Pasaiako alkatea, Goizane Alvarez, Gipuzkoako Foru Aldundiko Kultura, Lankidetza, Gazteria eta Kirol diputatua, eta Maria Jose Bilbao, Islandiako ohorezko kontsula Euskal Herrian.
2021ean, Basque Association in Iceland islandiar elkarteak Basque proiektuan parte hartzera gonbidatu zuen Albaola. Proiektu horren helburua 2025ean Djupavik herrian (Islandia) euskal zentro bat sortzea da. Duela 400 urte baino gehiago Islandian balea ehizatzen zuten euskal baleontziekin lotura estua duen eskualdea da hori.
Proiektuak eta Baskasetur izena izango duen etorkizuneko zentroak euskaldunen eta islandiarren historia partekatua oroitzea dute helburu, bai eta biek itsasoarekin duten harremana aintzatestea ere.
Sinposioa
Gaur goizean nazioarteko sinposioaren inaugurazio ofiziala egin dute faktorian. Sinposio hori Albaola elkarteak antolatu du Basque europar proiektuaren aterkipean, eta topaketaren gai nagusia bale-txalupa izango da. Elkarte pasaitarrak, proiektu horren bitartez, balea txaluparen eraikuntzaren eta erabileraren inguruko ezagutzak partekatuko ditu bertaratutakoekin.
Bi egunez bilduko dira Albaolan ontzigileak, historialariak eta hainbat arlotako adituak. Hamahiru hizlari izango dira guztira; goizean goiz iritsi dira horiek eta Islandiako delegazioa ontziola-museora. Xabier Agote Albaolako presidentek eta Xabier Alberdi Albaolako zuzendari zientifiko eta Donostiako itsas museoko zuzendariak eman diete ongietorria.
Irekiera instituzional horren ondoren, parte-hartzaileek bisita gidatua egin dute Albaola Itsas Kultur Faktorian, Xabier Agote presidentearen eskutik. Jende guztiarentzako irekiera ekitaldia gaur 13:30ean hasi da. Horri buruzko informazio guztia erantsitako programan eta Albaolaren webgunean.
