Landa Emakumeentzako Berrikuntza Saria jaso du 'Mater' ontziak
Landa Emakumeentzako Berrikuntza Sarietan aintzatespena jaso dute sanpedrotarrek. Izaskun Suberbiolak aldarrikapen feminista egin du.
'Mater' ontziaren zuzendari Izaskun Suberbiola, aintzatespen sariarekin. 
Joan den astean, Madrilen (Espainia), XIV. Landa Emakumeentzako Berrikuntza Sarien banaketa egin zuten, eta lehen sari bat jaso zuen horietan Mater Ontzi Museo Ekoaktiboak.
Sari banaketa 2010az geroztik antolatzen du Espainiako Nekazaritza, Arrantza eta Elikadura Ministerioak, urtero urriaren 15ean ospatu ohi den Landa Emakumearen Nazioarteko Egunaren harira. Saiakeraren asmoa da landa emakumeek jarduera ekonomikoaren dibertsifikazioan egiten duten lana aitortzea.
Eta aitortza hori jaso du, hain zuzen, San Pedroko atun ontziak. Entitateak Arrantza edo Akuikultura Berrikuntzaren kategorian jaso zuen lehen saria, eta Izaskun Suberbiola zuzendariak hartu zituen ikurra eta hitza: “Beti egiten dugu topo arraro begiratzen gaituen portuko kapitainen batekin… Emakumezko erreferente gehiago behar ditugu arlo guztietan zeinen gai garen adierazi eta normalizatzeko. Eta, nola ez, ingurumenarekiko errespetua, justizia soziala eta elkartasuna ardatz izango dituzten ortzi-muga berriak sortzeko.”
Bigarren saria Seo Fisterra Ria Muros Noia Costa Sostenible arrantza sektoreko emakumeen elkarteak irabazi zuen, gizarteratzeko entitateekin eta Outesko udalarekin garatutako Aula Sostible do Freixo proiektu kooperatiboa koordinatzeagatik. Hirugarrena, berriz, Agricola Gormaz taldearentzat izan zen.
