Elizaldeko jolastokia itxuraldatzen ari da, haurrak erdigunean jartzeko
Transpatioa proiektua orain dela bost urte jarri zuten martxan, jolastokiko botere harremanak eraldatzeko asmoarekin. Naturgunea zabaldu dute.
Elizalde Herri Eskolako jolastokia biziberritzeko proiektua jaio zen duela bost urte: Transpatioa. Bertako ikasleak eta guraso elkarteak zein Oiartzungo Udala ari dira elkarlanean.
Jolastokietako botere harremanak “desegin” eta beste hainbat helbururekin abiatu zuten indarrean dagoen proiektua: gozamenerako, esperimentaziorako, jolaserako, heziketarako eta elkarbizitzarako… “Haurren nahiak eta beharrak erdigunean jarrita”, adierazi dute parte-hartzaileek.
Azken finean, “erabilera ugariko” jolasleku “inklusiboa” lortu nahi dute.
Jolastokia hobetzeko prozesua
Proiektuan parte hartzen dutenek nabarmendu dutenez, haurren beharrak “kontuan hartu gabe” diseinatu zituzten jolastokiak.
“Hormigoi hutsekoak, ia itzalik gabe eta kirol-jolas gutxi batzuetarako prestatutako arkitekturaren ondorioz ez dira espazio bizigarriak eta askotarikoak izaten”, adierazi dute.
Haurrekin prozesua abiarazi zuten, beraien “amets eta nahiak erdigunean” jartzeko asmoz. Hainbat galderari erantzuten saiatu ziren: “Nola hedatu dezakegu natura jolastokira? Zer egin dezakegu aterpea toki atseginagoa eta erakargarriagoa izan dadin? Nola hobetuko dugu kantxa-guneko eta transpatioaren arteko elkarbizitza? Harmaila eremuko segurtasuna eta erabilera handitzeko ze aldaketa egin daitezke?”.
Ikasleekin lanketa egiten hasi ziren, eta beraien proposamen eta beharrak kontuan hartuta, eraldaketarako proiektua prestatu zuten Guraso Elkarteak eta eskolak. Udalari aurkeztu zioten egitasmoa, eta eraldaketari ekitea adostu zuten.
Naturgunea zabaltzea, lehen pausoa
Patioaren eraldatzea zatika egingo dute, udako hilabeteak aprobetxatu behar baitituzte aldaketak egiteko.
Hainbat fase izango ditu eraldatzeak, eta lehenengoa kantxaren azalera murriztu eta naturgunea zabaltzea izan da.
Berdegune berriak egin dituzte eta mendixka, zuloak eta bidexkak eraiki dituzte. Enborrak jarri eta zuhaixkak landatu dituzte, itzalguneak eta espazio atsegina lortzeko.
Egurrezko etxetxoekin herrixka bat eraiki eta mahaien eremua ere berritu dute. Gainera, txorientzat, intsektuentzat, tximeletentzat eta beste animalia batzuentzako bizitokiak jarriko dituzte ikasleek.
110.000 euroko inbertsioa egin du Oiartzungo Udalak.
Harmailen eraldaketa, hurrengoa
Kirol kantxa eta harmailak moldatu nahi dituzte hurrengo faseetan. Futbola eta saskibaloiaz gain, beste kirol batzuk sustatzeko ekipamenduak jarri nahi dituzte kantxan.
Beste eremuekin elkarbizitza eta segurtasuna “hobetu” nahi dituztela jakinarazi dute. “Ingurutik baloiaren beldurrik gabe pasatzea naturarekin eta jolasarekin lotutako elementuak jarriko dituzte”, iragarri dute.
Harmailak “goxatu” eta erabilera handitzeko aldaketa estrukturala egitea ere aurreikusi dute, “altuera lausotu, naturgunearekin lotu eta aurrealdean jolas eremu librea egiteko”.
Jakinarazi dutenez, “dimentsio handiko” obrak dira, eta diru-laguntzak lortu ahala joango dira egiten.
