"Ni prest nago", eta Pasaia?
Enplegu publikoko 100 lanpostutik 2 desgaitasuna dutenentzat gorde beharko lirateke. Hori aldarrikatuko du Atzegik kanpaina berrian.
Trintxerpeko Serafin Esnaola plazan egin zuten kanpainaren aurkezpena. 
Aurtengo kanpainaren ildo nagusien berri eman zuen Atzegik joan den asteartean, Trintxerpeko Serafin Esnaola plazan. Adimen desgaitasuna duten pertsonentzat enplegu publikoko deialdi gehiago eskatu ditu elkarte gipuzkoarrak.
Dagoeneko hasi dira agertzen kale, markesina eta sare sozialetan ikasturte berriko kanpainaren leloa daramaten aldarri eta kartelak. Ni prest nago, eta Gipuzkoa? galderarekin gizartea hausnarrarazi nahi du Atzegik, adimen desgaitasuna duten pertsonek enplegu publikoko plazak eskuratzeko duten eskubidea aldarrikatzearekin bat.
Izan ere, legez, lanpostu publikoen %2 adimen desgaitasuna duten langileek bete beharko lituzkete. Hala ere, bide luzea dago oraindik egiteke helburu hori erdieste aldera: “Gaur egun oraindik ezezaguna da hori jende askorentzat, eta oraindik are gutxiago dira deialdiak egokitzeko ahalegina egiten duten erakundeak”, salatu zuten.
Azken urteotan egoera hobera egiten ari dela ere aitortu zuten kideek, administrazio batzuk eskubide hori “egi bihurtzen” ari baitira. Eta bultzada hori probestu nahi du Atzegik beste organo publikoengana gerturatu eta gogorarazteko elkartea prest dagoela alor horretan “lagundu eta aholkuak emateko”.
