Commedia Nova, Soinuenearen Udazkeneko Kontzertuan
Erdi Aroko testu eta margolanak oinarri, bikote alemaniarrak garaiko dantza estiloak ekarriko ditu urriaren 28an, ahotsa eta perkusioa ere lagun.
Datorren urriaren 28an, larunbatean, Soinueneak Udako Kontzertua eskainiko du Landetxen. Aurtengo edizioan, bada, Gaby Bultmann berlindarrak eta Daniele Ruzzier veneziarrak osaturiko Commedia Nova bikotea oholtzaratuko da. Askotariko musika teknikak uztartzen dituen sortzaileak dira Izan ere, txirula mota eta perkutsiozko bitarteko desberdinak ahotsa eta dantzarekin batera lantzen dituzte. Artean, arrabita txirula erabiltzen dute.
Bultmann antzinako musika eta soinu tresnetan aditua da; dantzari eta aktorea, berriz, Ruzzier veneziarra. Hala, bikotearen xedea antzerkiak historian zehar izan duen bilakaera egungo musika eta dantza tekniken bidez transmititzea da. Kontzertuan zehar, “Istampitta: Musika eta dantza Erdi Arotik Barrokora” izenburupean, Erdi Aroko dantzak lurreratzen ahaleginduko dira, garai hartako testu eta margolanetan ageri diren deskribapenetan oinarrituta betiere. Antolatzaileek jakinarazi duten moduan: “kontuan izan behar da dantzari buruz ezagutzen diren lehenengo tratatuak Quatroccento italiarrekoak direla, baina orokorrean oholtzan ematen ziren dantzak koreografia idatzirik gabe mantendu zirela barrokora arte”.
Emanaldia arratsaldeko 19:00etan hasiko da, eta egunean bertan leihatilan sarrerak erosteko aukera egongo da, zortzi euroren truk. Helbide elektroniko honetara mezua bidalita egin daitezke erreserbak, aurrez.
