[Erreportajea] Gau Beltza lezoarrena izango da berriz ere
Lezon ere Domu Santu Egunaren bezperan arimen gaua ospatzen zuten. Usadio hori berreskuratu dute herriko eragileek, elkarlanean. Hilaren 31ko ekitaldiak aurrekari asko izango ditu.
Gau Beltzaren egitaraua prestatzeko hainbat bilkura egin dituzte eragileek. HITZA Gau Beltzaren gaineko hitzaldia eman zuen atzo Jaime Altuna hondarribiarrak Gezalan. Azaldu zuen Gau Beltza ez dela Halloween-en eragina lausotzeko bertan sortutako jarduera, baizik eta Domu Santu Egunaren bezperan, garai batean eta hemen, Euskal Herrian, baserrietako kalabazak hustu, izuari eta gizakien beldurrei lotutako kontuak haurrei kontatu, edo arima galduz mozorrotzen zirela herritarrak; horren zuzeneko testigantza eman zuten herriko bi adinekok hitzaldi horretan, Jone Salaberriak eta Agustina Pontestak. Kontatu zuten herriko baserrietan ere ospatzen zutela arimen gaua.
Hori guztia berreskuratu nahi izan dute Lezon. Lehenengoz, usadio zaharrak bere tokia izanen du, era ireki eta zabalean, herrian. Horren erantzule Lezoko eragileak dira. «Hasieran egitasmoa berreskuratzeko ideia herriko ikastetxeetako guraso elkarteena izan bazen ere, berehala atxiki ziren herriko hainbat eragile. Pozgarria izan da elkarlanerako deiak arrakasta izan duela ikustea», esan dute Gau Beltza Taldearen gidariek.
Domu Santu Egunaren bezperako ilunabarreko ekitaldi edo desfileari garrantzirik kendu gabe (goiko koadroan dago datozen egunetako egitarau osoa), ordura arteko bideari eman diote balioa antolatzaileek. Lehenik, herriko askotariko eragileen saretzea izan da ideia hutsa zen horri hezur eta mamia eman diona; ondoren, egunari izaera emateko aurretiko hainbat elkarlan jarduera antolatu dituzte denen artean, Olatz Sarasolak egindako kartelean zerrendatuta agertzen direnak.
Lezoko baserritarrek kalabazak landatu eta eman dizkiete. «Udalak ere asko lagundu digu», adierazi dute taldekideek. «Nabarmentzekoa da adin tarteari dagokionez urrun izan daitezkeen eragileen arteko elkarlanak sortu direla: Txirbilla eta Aiton Borda, edo Gaxuxa eta ludoteka batera ariko dira hainbat tailerretan. Zoragarria izan da hori».
Gaur arte
Maindireak. Pasaia-Lezo Lizeoan, Lezo Herri Eskolan eta udaletxean maindire eta trapu zaharrak uzteko aukera bertako edukiontzietan.
Hilaren 23tik 31ra
Dendak. Herriko dendetako arduradunei euren erakusleihoak Gau Beltzaren gaiekin apaintzeko eskatu diete.
Hilak 24, asteartea
17:30. Gurutze Santuaren plazan, buruko zapia prestatzeko tailerra Gaxuxako eta Lezoko ludotekako kideen eskutik.
Hilak 30, astelehena
17:30. Gurutze Santuaren plazan, kalabaza hustuketa tailerra Txirbillako eta Aiton Bordako kideen eskutik.
Hilak 31, asteartea
19:00. Goiko plazan hasiko da Gau Beltzaren kalejira. Bukaera plazan egingo dute, Beldurren Erretzea ekitaldiarekin eta gaztaina erreekin. Jarraian, Atzekoateko kobazuloan, Orratx! Antzerki Taldekoek beldurrezko istorioak kontatuko dituzte. Ondoren, Piztu Lezoren ekimenez, Andoni Ollokiegiren emanaldia.
