Hainbat musika ikastarotan izena emateko epea irekiko da astelehenean
Tomas Garbizuk helduentzako ikastaroak eskainiko ditu, eta izena emateko epea hilaren 31era arte luzatuko da. Bihar, bestela, urriko kantujira egingo dute.
Tomas Garbizu Musika Eskolako hainbat ikastarotan izena emateko epea irekiko du udalak urriaren 23an, astelehenean. Nagusiki, ikasle helduei zuzendurik dago eskaintza; eskolako zuzendari Xanti Espinak azaldu moduan inoiz ez baita “musika ikasteko berandu”. Eskaintzak konbo, folk, rock edo musika elektronikoko musika taldeak osatzeko aukera jasotzen du, baita ganbara musika edo musika hezkuntza (helduentzat) lantzekoa ere.
Euskal musika tresnei dagokienean, txalaparta, pandero, alboka zein dultzaina jotzeko ikastaroak antolatuko dituzte, baita bestelako askotariko musika tresnak menderatzeko ere. Horien artean trikitixa, pianoa, saxofoia, txistua, perkusioa, boilina, gitarra, edo bateria daude, besteak beste. Horietarako, matrikula epea urriaren 31ra arte egongo da irekita. Izena emateko, musika eskolara bertaratuta (astean zehar, 16:30etik 20:00etara) edo 943 529 999 telefonora deituz egin behar da.
Kantujira, bihar
Bestalde, bihar larunbata, urriko kantujira ospatuko da Lezon. 12:30ean abiatuko da Aiton Bordatik, eta Kaialde nahiz Kale Nagusian geldialdia egin ondoren, Gurutze Santuaren plazan bukatuko da. Beste behin ere, lezoarrek aukera izango dute “bizitza osoan Euskal Herriko txoko guztietan kantatu diren abestien melodiez gozatzeko”.
Antolatzaileek oroitarazi dute ekimena irekia dela, eta beraz, herritar guztiek parte hartzeko aukera dutela.
