[Bideo eta argazkiak] Palestinaren alde egin dute hamarnaka eta hamarnaka lagunek
Israelgo produktuei boikota egiteko eskaera zabaldu dute gaurko mobilizazioan, baita balkoi eta leihoetan Palestinako bandera eta ikurrak jartzekoa ere.
Manifestazio jendetsua joan den urriaren 20an Palestinaren alde Orereta Palestinarekin Herri dinamikak deituta. Hamarnaka eta hamarnaka lagunek egin dute bat gaurko Orereta Palestinarekin Herri dinamikak deitua zuen protestarekin. Zumardian elkartu dira 19:00etan eta hamar minutuz elkarretaratzea eginda, manifestazioa abiatu da; jendetsua oso. Buruan Palestinako bandera erraldoia, eta atzean hamaika pankarta. Palestinaren aldeko oihuak, Israelen kontrakoak nahastu dituzte ibilbide osoan zehar. Sarraskia gelditzeko, eta Israelen kontrako boikota eskatzen zutenak, eta Palestina askatzearen aldekoak ibilbide osoan zehar.
Hasiera puntuan amaitu da manifestazioa, Zumardian. Bertan hainbat herritarrek sortu berri duten Orereta Palestinarekin Herri dinamikak irakurketa egin du euskaraz, gaztelaniaz eta arabieraz.
Hamarkada luzez Israelgo Estatuak Palestinari ezarri dion “apartheidak eta politika kriminalak” punturik gorenera heldu direla salatu dute: “Nahikoa da. Ezin dugu onartu Israelgo Estatua Palestinarekiko erabiltzen ari den politika genozida. Ozen salatu nahi dugu Palestina errotik ezabatzeko saiakera”.
Israelgo Estatuaren jarrera gaitzestearekin batera Europari begira ere jarri dira Palestinari elkartasuna adierazteko egin duten mobilizazioan, izan ere, Israelgo Estatuarekin lerrokatzea egotzi diote, “irmo gaitzetsi nahi dugu Europaren jarrera”. Israelekin harremana duten Euskal Herriko enpresen jokaera ere arbuiatu dute, “ezin dugu beste aldera begiratu etekin ekonomikoak, palestinarren askatasuna, giza eskubideak eta biziaren gainetik jartzen ari direlako”.
Boikoterako deia
Orereta Palestinarekin Herri dinamikak hainbat dei luzatu ditu gaurko protestan. Lehena, Israelgo produktuei boikota egiteko eskaera, “ez eman xentimo bat bera ere Palestinaren genozidioaren arduradunari, ezta harekin lerrokatu direnei ere”. Eskaera argia ere gaur Palestinaren alde bildu diren horiek guztiek egin dutena, “bukatu dezatela berehala Palestinaren okupazioarekin; berma dadila palestinarrek euren herrian aske bizitzeko duten eskubidea”.
Palestinaren alde han-hemenka egiten diren deialdiekin bat egiteko eskatu diete bestalde herritarrei. Horren harira, bihar Donostian deituta dagoen nazio manifestazioarekin bat egiteko eskatu dute. 17:30ean abiatuko da manifestazioa Antiguako tuneletik, “Palestinaren aldeko oihuekin bete behar ditugu kaleak, hil ala bizikoa da”.
Beste hitzordu baten berri ere eman dute eta bertaratzera deitu herritarrak. Datorren ostiralean, hilak 27, elkarretaratzea egingo dute Foru Plazan Palestinaren alde 19:00etan; ordu erdi geroago, berriz, Palestinako erresistentzia aurrera lelopean hitzaldia Gaztañoko auzo lokalean; bi horiek, NATO eta EBren aurkako Herri Ekimenak deitu ditu.
Egiten diren deialdiei adi egiteko eskatu dute azkenik, eta herriko balkoi eta leihoak Palestinako bandera eta ikurrekin betetzera deitu.
Errenteria-Oreretako hainbat norbanakok sortutako dinamikak, gainera, herri dinamikarekin bat egitera deitu ditu herritarrak. Horren harira, hurrengo bilera hilaren 24an egingo duela jakinarazi du; 19:30ean izango da Gaztañoko Bukagaitz elkartean.
