[Argazkiekin] Artikulatzen hasteko Alternatiben Oihartzuna
Udala eta Alternatiben Oihartzungo kide banak hitzaldia eskaini dute eta bien arteko elkarlana "nola artikulatu" aztertzen ari direla izan dute hizketagai. Goizaren amaieran, Palestinari elkartasuna adierazi diote.
Hirugarren Alternatiben Oihartzunaren eguna izan da gaurkoa herriko plazan, Oiartzunen. “Burujabetzaren eta eraldaketaren bidean lanean ari diren egitasmoen topagune izatea” helburu gisa, horretan dihardutenen azoka egin da. Era berean, hitzaldiak ere egin dituzte goizean zehar.
Oiartzungo eta kanpoko eragileak dira bertaratutakoak. Herrikoen artean, Labore Oarso eta Elika kooperatibak, Argitturri energia komunitatea eta Abaraxka ludoteka izan dira.
Oiartzundik kanpokoen artean, berriz, Irungo Harrera Sarea, Herrerako (Donostia) Sukalde Kolektiboa, Coop57, Goiener, Izarkom, Euskal Herria Burujabe eta Basoa Defendatzaileen Etxea.
Udala eta burujabetza
Laugarren hitzaldian Oiartzungo Udaleko Ibon Mitxelena Ekonomia Soziala eta Subirautza zinegotziak parte hartu du, Alternatiben Oihartzuneko antolatzaile Iker Sarriegirekin batera.
Hitzaldiaren hasieran aipatu dute Oiartzungo udal gobernu berrira burujabetzaren herrigintzan aritutakoak batu direla. Orain, horiek udalean lanean hasi direnean, burujabetzan lanean dabiltzanen sarea udalarekin “nola artikulatu” pentsatzen hasi direla aurreratu dute.
Sarriegik azaldu du kapitalismo globala “tsunami bat” dela eta konturatu zela ez zirela haien bizitzen jabe, “beste batzuk ari zirela erabakitzen”. Horrek hiru ondorio ekarri dituela azaldu du Alternatiben Oihartzuneko kideak.
Batetik, herriaren “desjabetzapena” gertatzen ari dela. “Baliabideak gutxi batzuek esku daude: lurra, energia, eraikinak, elikadura…”. Horren harira, bigarren ondorio moduan indibidualizazioa gertatzen ari dela aipatu du. “Ereduak pertsonengan eta herriari egiten dio eragina bakartasunera eta elkartasun ezara”.
Azken ondorioa boterearena izan da. “Arrain handia arrain txikia jaten ari da eta herriak ez dauka botererik. Hori aldatzeko kontrakoa egin behar da”. Horretarako, “gure bizitza antolatzeko era” berreskuratu behar dela azaldu du Sarriegik eta horretan Alternatiben Oihartzunaren garrantzia nabarmendu du, “ikusteko ez garela lauzpabost katu”.
Mitxelenak adierazi du gai honen gainean “heziketa” egin behar dela udal barruan, “horrelako proiektuak aurrera egiteko”. Horretarako artikulazioari erreparatu dio eta hori eraikitzeko hainbat galdera dituztela mahai gainean esan du zinegotziak: “Udaletxeak parte hartu behar du kooperatibetan? Bai? Ez? Nola?”.
Euskal Herrian, estatuan eta munduan dauden ereduak begiratu dituztela eta gertukoek egindako bidea aztertzen ari direla dio Mitxelenak (Bergara, Hernani, Aiaraldea…). Modu horretan jakin nahi dute zein bide egin behar duen Oiartzungo Udalak.
Oraingoz, hiru erpin identifikatu dituztela azaldu du zinegotziak: herri mugimendua, eragileak eta udala. “Hiruki horretan hemendik etorkizunera kolaborazio hori nola izango den asmatu behar dugu. Hiru erpinetakoak mahai batean eseri eta ikusi behar dugu 30 urte barru zer nahi dugun Oiartzunen”.
Palestinari elkartasuna
Goizaren bukaeran Palestinari elkartasuna adierazi diote, “mundu ero hau gelditu behar dugu, orain eta hemen”. Antimilitaristen hitzak ekarri dituzte: “gerra hauek hemen hasten dira, gureak dira. Ez armak hemen ekoizten ditugulako soilik, egunerokoan egiten ditugun hamaika hautuk eta gure bizi ereduak, oro har, nor indartu erabakitzen duelako”.
Herri guztien burujabe izateko eskubidea aldarrikatu dute. Burujabetza “betebeharra” dela diote “zapalkuntzarik gabeko mundu bat eraikiko badugu, eta hortik abiatuta soilik sor daiteke herri arteko elkartasun zintzo bat ere”.
