Gau Beltza gau bakarra izatetik aste izatera pasatuko da
Zortzi ekitaldi izango ditu aurtengo Gau Beltza Asteak. Abaraxka ludotekarekin batera beste hainbat eragile ari dira prestaketan.
Berritasunak badatoz ere, Gau Beltzeko ibilbide beldurgarriak ez du hutsik egingo. Urriko azkeneko gauean Gau Beltza ospatzea berreskuratu zuten duela urte batzuk. Aurten inflexio-puntu bat izango da, gau bakarra izatetik aste batera luzatuko baita.
Abaraxka ludotekak antolatu ohi zuen gaueko ekitaldia, eta aurtengoan antolakuntza taldean ibiliko da, beste hainbat eragilerekin batera. Oiartzungo Antzerkizaleen Elkartea, Ttur-ttur edota Zaintzadi dira horietako batzuk. Kolaboratzaile gehiago izango dituzte baita ere.
Egitaraua datorren ostiralean hasiko da, hiru ekitaldirekin. Azaroaren 4ra arte luzatuko da, eta guztira zortzi jarduerak beteko dute egitaraua, tartean Gau Beltzeko ibilaldi jada klasikoa.
Egitaraua
- Hilak 27, ostirala: 2 eta 3 urte arteko haurrentzako ipuin kontaketa, eta helduentzako Mintzariketa. Manuel Lekuona bibliotekan, 17:00etan hasita.
- Hilak 27, ostirala: Beldurrezko filma nerabeentzat, gazte topaleku berrian.
- Hilak 28, larunbata: Gau Beltzeko arropak prestatu eta kalabazak husteko saioa. 16:30ean, Abaraxka ludotekan.
- Hilak 28, larunbata: Janari dastaketa beldurgarria. Landetxen, 19:00etan.
- Hilak 31, asteartea: Gau beltza.
- Azaroak 2, osteguna: Hitzaldia, Aingeru Oiartzabalen eskutik. Heriotza bizitza da. Pleno aretoan, 17:00etatik 19:00etara. 9 urtetik gorako haur eta helduentzako.
- Azaroak 4, larunbata: Kandelen inguruan istorioak. Pleno aretoan, 17:00etan.
