Haiekin batera kantatzera gonbidatu ditu lezoarrak Sutargi abesbatzak
Ikasturte berria hasi dute jada, beste urte batez, "elkarrekin eta lagunartean kantuan gozatzeko".
Lezoko Sutargi abesbatzak ikasturte berria hasi du dagoeneko, eta haiekin batera kantatzera gonbidatu dituzte herritarrak. Entseguak astelehen eta ostegunean izango direla iragarri dute, 19:30ean, Musika Eskolan.
Musika Eskolako ikasleen guraso eta eskualdeko beste zenbait kantuzaleren artean osatutako taldea da, “elkarrekin eta lagunartean kantuan gozatzeko” asmoarekin sortutakoa. Urtean zehar askotariko ekitaldi eta emanaldiak egiten dituzte.
Koru amateurra da Sutargi, eta gogorarazi dutenez, haien helburu bakarra “kantuan ongi pasatzea” da. Bide batez, solfeoa jakitea ez dela beharrezkoa nabarmendu nahi izan dute.
Informazio gehiago jaso nahi dutenek edo zuzenean abesbatzarekin harremanetan jarri nahi dutenek 943 52 99 99 telefono zenbakira hots egin dezakete.
