Joakina Artolak ehun urte bete ditu
Udaleko ordezkariak bisitan joan zaizkio, eta Ariztegi etxadiko auzokideek festa antolatu zuten bere omenez.
Joakina Artola, udaleko ordezkariekin. Joakina Artola Alday 1923ko urriaren 25ean jaio zen. Beraz, atzo ehun urte bete zituen. Mendeurrenak merezi duen bezala ospatu zuten, Sabino semeak lagun zuela.
Bisita ugari jaso zituen atzoko egunean, tartean Joana Mendiburu alkatearena eta Olaia Lasa Ongizate zinegotziarena. Oiartzuar guztien partez zoriondu zuten, eta lore-sorta bat oparitu.
Ugaldetxon jaio zen duela ehun urte eta, aipatu dutenez, hitz-jario handiko emakumea izan da, diru-kontuak “xuxen” eraman dituenak. Familiaz “harro” dagoen emakumea da, eta 1936ko Gerrako kontuak memorian gordeta dituena.
Hainbeste bizitzeko sekretua ere azaldu du Artolak: “Gauzak etortzen diren bezala hartzea”.
Arratsaldean Aritztegi etxadiko auzokideek festa antolatu zuten, Artolaren omenez. Agurra dantzatu zuten, baita bizkotxoa jan eta xanpainarekin topa egin ere.
Artolak auzokideei opa zien 100 urte betetzera iristea.
