Antxotarrak badiarekin lotzen dituen zubia bihar kenduko dute
Portu Agintaritzaren arabera, pasabide metalikoa ez da segurua horren azpitik dabiltzan trenentzat. Errepideko errei bat itxiko dute bihar.
45 metroko egitura desegiteari ekingo diote bihar bertan. 
Pasai Antxoko Adifen lurzorua portu eremuarekin lotzen duen zubi metalikoa kendu egingo dute. Hala jakinarazi du gaur goizean Pasaiako Portu Agintaritzak, eta bihar bertan ekingo diete lanei.
Portuaren arabera, pasabide gorria jada ez da segurua horren azpian dauden burdinbideetatik dabiltzan trenentzat. Ekainaren 22an pasabidetik hormigoizko plaka bat jausi zen trenbide horien gainean, eta horren ondorio zuzena izan da erabakia. Bihar 07:00etan hasiko ditu portuak Buenavista kaiaren parean dagoen pasabide metalikoa kentzeko lanak.
Altzairuzko eta hormigoizko 45 metroko egitura mistoa da kenduko dutena, 3 metro zabal eta 60 tona inguruko pisua dituena. Hori eraitsi ahal izateko 800 tonako garabi bat erabiliko dute, eta eragin zuzena izango du makinak trafikoan: bihar, larunbata, 11:00etatik 14:00etara, Nafarroa etorbideko errepidearen Donostiarako noranzkoko erreia itxita egongo da. Txandaka igaroko dira ibilgailuak bertatik, alde batera zein bestera.
“Pasabidearen egoerak ez du ahalbidetzen azpian doan tren trafikoaren segurtasuna bermatzea”, azaldu du David Candelario PPAko zuzendariak. Adifek “premiazko esku hartzea” eskatu dio PPAri, pasabideak gaur egun duen arriskua ezabatzeko.
