Energia eraginkortasunaren alde egindako ahaleginari, saria
50/50 egitasmoaren barruan diru saria jaso dute Bizarainek, Cristobal Gamonek, Karmengo Amak, Elizaldek eta Lezo Herri Eskolak.
Gaurko ekitaldiaren argazki orokorra. Energia eraginkortasuna sustatzeko egindako ahaleginak merezi izan du. Oarsoaldeko bost ikastetxe publikok egindako ekintzen bidez, 35.000 euroko diru aurreztu dituzte CO2 emisioak murriztu dituztelako. Ikastetxe horiek Pasaiako Karmengo Ama Herri Eskola, Oiartzungo Elizalde Herri Eskola, Lezo Herri Eskola, eta Errenteria-Oreretako Cristobal Gamon Ikastetxea nahiz Bizarain Ikastola izan dira. Egindakoagatik olesaz gain, dirutan ere jaso dute aitortza ikastetxe horiek. Baina, sariak emateko Oiartzungo Landetxen gaur egindako ekitaldian, ikasleengan jarri dute fokua. “Lorpen handi horien benetako egileak omentzea garrantzitsua da, hau da, horien atzean ikastetxeetako ikasleak daude”, esan dute Oarsoaldea Garapen Agentziatik.
Izan ere, Oarsoaldea Garapen Agentziak eskualdean garatu, eta Gipuzkoako Foru Aldundiko Jasangarritasun Departamentuak finantzatutako egitasmoaren barruan egin dituzte energia aurrezteko eta CO2 gutxiago sortzeko ekintzak eskualdeko ikastetxeetan: 50/50 izena du proiektuak. Oarsoaldeko ikastetxeetan 2019tik ari dira garatzen 50/50.
Egitasmoak hezkuntza komunitateak energia eta uraren kontsumoari dagokionez ohitura iraunkorrak hartzearen garrantziaz kontzientziatzea du helburu, portaera aldaketa sustatuz. Hala, kontsumo eta ekonomia adierazleetan, kontsumoen denbora errealeko monitorizazioan eta hezkuntza komunitate osoa inplikatzeko pizgarrietan oinarritzen da. Pizgarri ekonomiko horiek bi zatitan banatzen dira:
-
Aurrezpenaren % 50 hezkuntza-komunitateari ematen zaio, sari gisa.
-
Gainerako %50a aurrezpen garbia da, eskolako instalazioen eraginkortasuna hobetzera bideratua, horrela aurrezki berriak sortuz.
“Edonola ere, lorpen ekonomikoez eta CO2 emisioen murrizketaz gain, proiektuaren gauzarik baliotsuenak dira baliabideak modu arduratsuan erabiltzeko betebeharra lehenbailehen ulertzea, eta eskaintzen duen esperientzia pedagogikoa”, azaldu dute Oarsoaldetik.
Gauzak horrela, eta hezkuntza komunitateei eman beharrekoaren arabera, honakoa da gaur Landetxen ikastetxe bakoitzak jaso duena: Lezo Herri Eskolak, 6.071,25 euro; Cristobal Gamonek, 4.483,54 euro; Bizarainek, 2.693,98 euro; Karmengo Amak, 2.000 euro; eta Elizaldek 1.935,52 euro.
Babesa
Oarsoaldeko ikasleek askotariko ordezkariak izan dituzte alboan gaurko sari emate ekitaldian. Hala, tokian tokiko hezkuntza zentroetako energia taldeetako kideez eta haien irakasleez gain, Oarsoaldeko udalerrietako hautetsi eta teknikariak, Oarsoaldea Garapen Agentziako ordezkariak, eta aldundiko Trantsizio Ekologikoko zuzendari Monica Pedreira izan dira Landetxen.
