[Bideoa] Urteko gaurik ilunena Pasaiara heldu da
Donibane, San Pedro eta Antxon ari dira Gau Beltza prestatzen. Sanpedrotarrak gaur elkartuko dira, eta sanjuandarrak, bihar.
Iazko Pasaiako Gau Beltzeko artxiboko irudia. 
Aurten ere, Gau Beltzak ospatuko dituzte Pasaian hilaren 31n. Barrutiz barruti egun horretako egitarauak antolatzen ari diren bizilagunek gaur arte jakinarazitakoaren arabera, Antxo, Donibane eta San Pedron izango dira urteko gaurik ilunenaren bueltakoak.
Antxo eta San Pedron hilaren 31ra mugatuko dute ospakizuna. Donibanen, aldiz, bihar bertan, larunbatarekin, ekingo diote beldurrak pizteari. Barruti morekoek ez dute eman egitarauaren berri, baina gaur, ostiralarekin, 17:30ean elkartuko dira frontoian, mozorro tailerrean. Gerturatzeko deia egin diete bizilagunei.
Donibaneko Gau Beltza
Haur eta gaztetxoak izango dira protagonista Kultur Aterpean bihar, 17:30etik aurrera. Ordu horretan hasiko da Gau Beltzeko kontakizuna, eta ordubete beranduago abiatuko da prestaketa tailerra, gurasorik gabe. Nork bere kalabaza eraman dezala eskatu dute. Azkenik, gaztetxoek prestaturiko afaria egingo dute 21:00etan LH6tik aurrerakoek.
Asteartean bai, San Juango haur, gazte zein helduei egin diete deia “animatu eta mozorrotzeko”. 18:00etan aurpegi margoketa egingo dute Bixi-Bixiren egoitzan, 19:00etan, kalejira herrian zehar abestuz eta eskean. Ordu eta erdi beranduago, 20:30ean, jaiari amaiera emateko ekitaldia eta merienda egingo dituzte, eta azkenik, 21:30ean, mozorro lehiaketa eta musika.
Antxoko Gau Beltza
Barruti gorrian iaz egin zuten lehen aldiz Gau Beltzeko ibilbide beldurgarria, eta aurten jarraipena emango diote ideia berberari. Datorren asteartean, beraz, 18:30ean ekingo diete haur eta familiek gauerako prestalanei: Biterin kalabazak husteko tailerra eta aurpegi margoketa egingo dute. Nork etxetik kalabaza eraman dezan eskatu dute antolatzaileek, eta baita kristalezko pitxarra bana ere, bertan kandelak sartu ahal izateko.
Gau Beltza 20:00ak inguruan hasiko dela ohartarazi dute Papineko Gazteria eta Antxoko gurasoek —horiek dabiltza antolakuntza lanetan—, baina xehetasun gehiago ez dute eman. Hori bai: lehen aldiz ibilbide beldurgarriaren mapa osatu dute aurten, eta horrek, beharbada, pistaren bat emango dio baten bati… Aurrerapen bideoa ere egin dute. Horratx biak:
