Laura Re eta Danelicious, 'Zozoak beleari' podcastaren aurkezle
Hamaika Telebistaren azken podcastaren gidari izango dira antxotarra eta arrasatearra. Beldurren inguruan arituko dira astean behin.
'Zozoak beleari' izango du izena Re eta Daneliciousen podcastak. 
Laura Re antxotarra izango da, Danelicious arrasatearrarekin batera, Hamaika Telebistaren podcast berriaren aurkezlea. Zozoak beleari izeneko euskarazko audio blogean beldurren inguruan arituko dira astero.
Saioak bitan emango dituzte: igandeetan 16:00etan Spotify, Ivoox eta Youtuben, eta asteazkenetan, 22:00etan, Hamaika Telebistako emisioan, zuzenean. Guztira 30 minutuko zortzi atal izango dira, eta estreinaldia igande honetan izango da, hilak 29.
Aurkezleek gonbidatu bat izango dute saio bakoitzean, eta hiruen artean “gertuko elkarrizketa bat” josiko dute. Asmoa da askotariko beldurren inguruan hitz egin eta hausnarketa interesgarriak egin ahal izatea. Gonbidatuak ez du aldez aurretik jakingo zein izango den saioan jorratuko den beldurra.
Ziurtatu dute gaiak serioak izango badira ere, umorea eta irakurketa feminista nagusituko direla podcastean. Formatuari dagokionez, estudio barruan ez ezik, kalean ere egingo dituzte saioak, dira kale-galdeketa atalean gazte euskaldunen iritziak jasotze aldera.
Euskararen alde
Saioaren helburua euskara gazteei gerturatzea da, entretenimenduaren bitartez eta era informal batean. Egungo gazteek kontsumitzen dituzten saioak ardatz hartuta, euskaraz izango den proposamen bat luzatu nahi izan zaie euskarazko programak hurreratzeko eta eskaintza zabalean tarte bat egiteko.
