"Milaka herritarren bizitzen bizigarritasuna dago auzitan"
Lezoko Udaleko EH Bilduko eta EAJko hautetsiak, epaitegietatik euskara jasaten ari den erasoen kontra azaldu dira.
Euskararen kontrako epaitegien oldarraldiaren aurrean, Lezoko EH Bilduko eta EAJko ordezkariek adierazpen bateratua landu eta jendaurrean aurkeztu dute gaur. “Larria da gertatzen ari dena: euskararen biziberritze prozesuaz harago, milaka herritarren bizitzen bizigarritasuna dago auzitan, eta harekin batera berdintasuna, justizia eta kohesio soziala. Funtsean, bizikidetza”, esan dute. Aldi berean, azaroaren 4an Bilbon egitekoa den manifestazio nazionalean parte hartzeko eskatu diete lezoarrei, eta gainera, gaur egitekoa den herri argazkira (19:00etan, Gurutze Santuaren plazan) ere ager daitezen egin diete gonbita hautetsiek.
EH Bilduren izenean Mikel Arruti alkatea eta Iker Salaberria Euskara zinegotzia izan dira agerraldian. EAJko partaideak, berriz, Laura Martinez eta Juan Luis Urkizu. Arrutik eta Martinezek hartu dute hitza.
Azaldu dute Lezo beti izan dela harrera herri, “jatorri anitzeko herritarren topaleku”. Horrela, Lezon hamaika hizkuntza biltzen direla adierazi dute. “Halere, herritar horiekin guztiekin batera, berezko hizkuntza eta gutxitutako hizkuntza dugun euskararen normalizazioan aurrera egiteko borondate eta konpromiso sendoa erakutsi dugu”. Azken hamarkadan herrian euskararen ezagutza %4 hazi dela jakinarazi dute, eta udalean bertan euskararen alde egindako urratsei balioa eman diete. Gainera, lezoarren %61 inguruk euskaraz dakitela zerrendatu dute, eta %19 ulertzeko gai direla. “Beraz, gure hizkuntza komunitateak bizi izan duen gutxiagotze prozesu gogorrari aurre egiteko bide luzea dugu oraindik”.
Kezka azaldu dute hautetsiek epaitegiak euskararen normalizazioaren kontra hartzen adi diren erabakien harira. “Oldarraldi judiziala” direla esan dute EH Bilduren eta EAJren ordezkariek, eta “euskararen normalizazio prozesua trabatu eta egindako lanaren bidean atzerapausoak eragiteko olatu erreakzionario, atzerakoi eta euskarafoboak” direla. Azken bi urteetan Euskal Herrian izan diren normalizazioaren kontrako sententziek eragindako herriak zerrendatu dituzte, eta EAEko Udal Legearen eta hori garatzeko dekretuen kontrako sententziak ere salatu dituzte: “Azken epaiek, beraz, toki autonomiaren aurka jotzen dute, eta hizkuntza arloko udal eskumenen garapena mugatzen dute”.
Epaien oinarrira jo dute hautetsiek. “Argi dago azken hilabeteotakoak ez direla sententzia isolatuak. Botere judizialetik hizkuntza politika aurrerakoiak mugatzeko eta herritarron hizkuntza eskubideak murrizteko erabakiaren eta oldarraldiaren erakusle baizik. Ez da kasualitatea epai guztien oinarria zein den: gaztelaniaren nagusitasuna ezartzen dute, eta, beraz, legeak aitortzen digun euskararen ofizialtasuna jartzen dute kolokan”. Horren aurrean, mobilizazio sozialera deitu dituzte lezoarrak. “Bada garaia urrats bat egin, euskararen gaia erdigunean jarri, eta elkarrekin eragiteko. Oraintxe auzitegietatik hartzen ari diren erabakien ondorioek atzerapauso handiak eragin ditzakete urte luzeetako ahaleginari esker lortutako eskubideetan eta euskararen biziberritze prozesuan”.
