[Erreportajea] Bekoerrotako sareak zulatu arte, gogor lanean
Munttarpe Eskubaloi Klubak bost talderekin ekin dio 2023-2024 sasoiari. Emakumeen eta gizonen senior taldeak maila bat gora egiteko lehiatuko dira. Harrobiko jokalariak, sendo.
Munttarpek eskubaloia eta musika uztartu nahi ditu proiektu berri batekin. Matraka izango dute bidelagun. Bizkor hasi du Lezoko Munttarpe Eskubaloi Klubak 2023-2024 sasoia. Orotara bost talderekin ekin diote lehiari: emakumeen Gipuzkoako Lehen Mailakoa, Gizonen Gipuzkoako Bigarren Mailakoa, nesken Gazte Mailako bi lagunarte dituzte, eta bosgarrena nesken Kadete Mailakoa da. Nagore Tolosa kirol elkartearen presidenteak talde nagusien helburuak garbi azaldu ditu: neska seniorrek Euskal Ligara igotzeko fasean nahi dute izan; gizon seniorrek, berriz, herrialdeko lehen mailara igo.
Osasun onean dago Munttarpe, hala baieztatu du Tolosak. Lizentzia asko dituzte, eta horrek aurrera jarraitzeko indarra ematen die. Harrobian jarri du fokua presidenteak: «Harrobiko taldeetan badugu indarra. Urtetik urtera aldatzen da hori. Aurten ongi goaz, baina gerta daiteke datorren sasoirako lizentzien kopurua jaistea». Izan ere, Ereintza Eskubaloi Taldearekin jokalarien elkartrukerako akordioa du Munttarpek, eta horren arabera jokalari gehiago edo gutxiago izaten dituzte urterik urtera.
Badira bederatzi sasoi lehian hasi zela Munttarpe. Hasierako urteetan seniorren taldeak zituzten bakarrik. Orain, harrobiko taldeekin egitura sendoagoa dute. «Ereintzarekin dugun akordioagatik indartzeko aukera izan dugu. Gainera, geroz eta ezagunagoak gara, gure izena zabaltzen ari da».
Gazteak erakarri
Formazioan zein gazteak erakartzeko lanean dabiltza Munttarpekoak. Hala, Ereintzarekin eta Donibane Eskubaloiarekin batera udan egindako haurren campusari balioa eman nahi izan dio; Eguberrietan ere errepikatuko dute. «Zaila da gazteak eskubaloira erakartzea. Futbolak indar handia du, eta gainera, Lezon Eskola Kirola egiten denean, saskibaloiko partidak dira. Lezo Herri Eskolarekin ere saioak egiten ditugu. Lezo herri txikia da, zaila da jokalariak erakartzea, baina lanean ari gara».
Proiektu asko dituzte buruan, bestalde, Munttarpekoek. Horietako batek Matraka Musika Elkartearekin —taldearen babesleetakoa da— du harremana. «Gauza polit bat landu nahi dugu. Aurrerago, guztiz hezur-mamitzen denean, emango dugu horren berri», iragarri du kirol elkartearen buruak.
