Behin-behineko 66 aparkaleku plaza gehiago egokituko dituzte Hospitalillon
Azaroaren 6an hasiko dira egokitze lanekin, eta hil, horren erdialderako eginak izatea aurreikusi du Gipuzkoako Foru Aldundiak.
Aurretik Ziriza ondoan egokitu zituzten aparkalekuen irudi birtuala. Gipuzkoako Foru Aldundiak, Pasaiako Udalak, eta Pasaiako Portuko Agintaritzak adierazi dute Trintxerpeko Hospitalillo inguruan behin-behineko 66 aparkatzeko plaza egokituko dituztela aurki. Zehazki, azaroaren 6an hasiko dira egokitze lanak, eta hil horretako erdialderako erabiltzeko prest izanen direla aurreikusi dute. Horrela, lehendik Ziriza ondoan ezarri ziren 198 tokien osagarri izango da Hospitalilloko gunea.
Adinberriren eraikina egin bitarteko epean izango dira erabilgarri Zirizako 198 tokiak (gauez Trintxerpen erroldatuta daudenek bakarrik aparka dezakete han) nahiz Hospitalilloko 66ak. Horiei, Pasaiako Udalak Aranederren irailean ireki zituen hamazazpi aparkalekuak gehitu behar zaizkie (egoiliarrentzat dira azken horiek). Behin Adinberriren eraikuntzak aurrera egin ahala, plaza horiek kenduko dituzte, proiektu horren barruan 468 tokiko lurpeko parkina egingo baita.
Adinberri
Adinberriko lanak uztailean hasi ziren, 48 hilabeteko egikaritze epearekin. “Gipuzkoako gizartearen zahartzeak dakarren erronka handiari lankidetzatik eta berrikuntzatik erantzuteko” zentroa da, aldundiak zehaztu dutenez. Hala, foru erakundeak adierazi du proiektuan 66 milioi euroko inbertsioa egingo duela, “aldundiak funts propioekin azken hamar urtean egindako inbertsiorik garrantzitsuena da”.
Azpiegiturak adinekoentzako 124 plazako egoitza bat, 22 plaza izango dituzten tutoretzapeko hemezortzi apartamentu, eta eguneko zentro bat izango ditu. Gainera, zahartzearen gaineko ikerketa, esperimentazio eta testaketarako gunea ere izango ditu proiektuak. Trintxerpeko herrigunearekin integratuko den plaza egingo dute aldi berean, “baita hainbat instalazio komun eta erabilera anitzeko gunea ere”, aldundiaren esanetan. 400 lanpostu sortuko direla ziurtatu du foru erakundeak.
