Gazako "genozidioa" salatu dute Errenteria-Oreretan
NATO eta EBren Aurkako Herri Ekimenak deitutako mobilizazioan dozenaka oreretar bildu dira. Ondoren, hitzaldia izan zen Gaztañon.
“Gazako genozidioa” salatu zuten atzo arratsaldean Errenteria-Oreretan, Foru plazan. NATO eta EBren Aurkako Herri Ekimenak deitutako mobilizazioan dozenaka izan ziren bertaratu ziren herritarrak. Ondoren, Gaztañoko auzo lokalean Al Yudur elkarteko kide Taher Alik hitzaldia eman zuen.
Hilaren 7an Palestinako erresistentzia Israelen kontrako erasoaldira pasatu zen. Horren aurrean, Israelek erabaki du Gaza deuseztea. “Une honetan Gazako zerrendako palestinarrek bonbardaketa gogorrak eta estatu sionistaren blokeo krudela pairatzen ari dira. Genozidioa. 7.000 palestinar baino gehiago erail dituzte, horietatik 3.000 haurrak”, azaldu zuten elkarretaratzearen bukaeran egindako irakurketan. Israel azpiegitura zibilak bonbardatzen ari dela nabarmendu zuten, eta ura, elektrizitatea eta elikagaien hornidura eten dituela Gazan: “Hori gutxi balitz, Palestinako ondasun materialak eta Zisjordanian lur palestinarrak erre ere egiten dituzte”.
Israelek “potentzia atlantistak” lagun dituela adierazi zuten atzokoan, eta deitoratu zuten askok “jarrera sionistak” babesten dituztela, “mikrofono mertzenarioek, iritzi emaileek oro har, eta era guztietako politikoek… Argi geratzen da jende honen moral bikoitza eta hipokresia”. Horiek Gazako kontrako erasoak daudenean non dauden galdetu zuten, eta ezkerreko hainbat sektorek “gezurrezko bakezaletasuna eta ekidistantzia lotsarik gabe” zabaltzen dutela.
Horren aurrean “Euskal Herrian gehiengo antiinperialista bat antolatzen jarraitzeko” deia egin zuten, eta azaldu zuten Palestinako herriarekiko elkartasuna adierazteko deiak areagotuko dituztela. Zentzu horretan, Orereta Palestinarekin plataformak astero egiten dituen deialdietara agertzeko eskatu zieten herritarrei, bai eta gaur Bilbon egitekoa den (18:00eta, Jesusen Bihotza plazatik) manifestazioarekin bat egin dezatela, Palestinarekin Elkartasunak deiturikoa azken hori.
