"Nazka-nazka eginda gaude"
Epaitegietatik euskararen kontra hartutako erabakien kontra, eta Bilboko nazio manifestaziorako deia egiteko dozenaka lezoar bildu ziren atzo.
“Nazka-nazka eginda gaude. Epaitegietatik euskarari egiten ari diren erasoengatik nazkatuta eta aspertuta”. Hala esan zuen atzo arratsaldean, euskararen kontrako epaitegietatik hartu diren erabakien kontra agertzeko herri argazkia egindakoan, partaideetako batek azaroaren 4ko nazio manifestaziorako autobusen berri eman aurretik. Nabaria izan zen asperdura hori Gurutze Santuaren plaza eta Goiko plaza batzen dituen eskaileran batu ziren dozenaka eta dozenaka lezoarren artean.
Haurrak, gazteak, helduak eta adinekoak. Argazki oso esanguratsua atzo arratsaldekoa. Aurrean haurrak. “Zergatik zaudete hemen?”, galdetu zion umeetako batek ondoan zuenari; “Euskara hiltzea nahi dutelako”, ondokoaren erantzuna.
Herriko argazkia protesta ekintza soila baino askoz gehiago izan zen. Izan ere, azaroaren 4an (datorren asteko larunbatean) Bilbon egitekoa den (17:00etan hasiko da, Euskaldunan) manifestaziora deialdia egiteko ere baliatu zuten irudia. Hara joateko Lezotik autobusak aterako dira; atzoko herri erantzuna ikusita, ziur bat baino gehiago izango direla.
Jada zabalik daude autobus horietan izena emateko zerrendak: Lezo Herri Eskolan, Pasaia-Lezo Lizeoaren Lezoko egoitzan, Oroitzene AEKn eta Tiñelun daude. Bilborako joan-etorriaren prezioa bost eurokoa da adin txikiko, erretiratu eta langabeentzat; 10ekoa gainontzekoentzat. Azaroaren 4an, 15:00etan aterako dira manifestaziora joateko autobusak, Ijurkotik.