Oiartzuarren aitortza Alex Bargallo Zuzuarregiri
Atzo jaso zuen Alex Bargallo Zuzuarregik Oiartzungo Kirol Saria. Elizaldetarrak Judo Elkartean 40 urte daramatza lanean.
Oiartzungo Kirol Astearen azken aurreko ekitaldia hunkigarria izan zen. Atzo egin zuten, Landetxen. Alex Bargallo Zuzuarregik, herritarrek hala erabakita, jaso zuen Kirol Saria. “Ez dakit merezimendu handirik duen, gustatzen zaidan zerbait egiten dudalako eta gainera, jende bikaina dut inguruan. Nolanahi ere, mila esker”, esan zuen Bargallok behin saria eskuan. Ondoan izan zituen Elizaldetarrak Judo Elkarteko kideak sari emate ekitaldian. Duela 40 urte sortu zuen kirol taldea Bargallok. Saria ematea haren lanari aitortza izan zen.
Edorta Fernandez Kirol zinegotziak hartu zuen ekitaldiko lehen hitza. Bargallok Elizaldetarrak-en 40 urtez 2.250 ikasle izan dituela azaldu zuen. “Judoarekiko pasioa kutsatzen jakin duzu. Lehen ikasle zirenak guraso dira orain. Kasu batean hiru generazio ere pasa dira zure eskuetatik. Judoaren beste familia bat sortu duzu”. Oiartzunen izenean eskerrak eman zizkion Fernandezek, “judoaren bitartez oiartzuarrak kirolean eta baloreetan hezi dituzulako, inor atzean utzi gabe”.
Elizalde Herri Eskolako gurasoei esker hasi zen Bargallo judo eskolak ematen. Ez ziren falta izan atzoko ekitaldian guraso horiek. Haien izenean David Muñozek hitz egin zuen: “Judoan ikasten den lehenengo gauza nola erori da. Zuri esker azkar dominatu genituen ukemiak. Pixkanaka barneratu genuen, ordea, ukemia ez dela erortzea, erori eta berriz altxatzea baizik. Maitasunez erakutsi diguzu garrantzitsuena ez dela zenbat aldiz erortzen garen, zenbat aldiz altxatzen garen baizik”. Bargallori buruzko bideoa ere ikus zuten Landetxen izan zirenek. Bertan, besteak beste, ikasle izan zirenen hitzak jasoak zeuden.
Ekitaldiaren azken zatian jaso zuen Bargallok saria, Joana Mendiburu alkatearen eskutik. Gai baten “errudun” izendatu zuen judo irakaslea: “40 urteko ibilbidean Oiartzungo hainbat eta hainbat etxetan hiztegi berri bat sartu duzu”. Alkateak nabarmendu zuen haurrek babesa sentitzen dutela Bargallorekin lehiatzera joaten direnean, “bere eskuetatik pasa zareten oiartzuarrek Alexek eskainitako oroitzapen onak eta berekiko maitasuna besterik ez dizkidazue aipatu”. “Bihotz-bihotzez” eskerrak eman zizkion alkateak, “puntakoa ez den kirol diziplina batean horrelako miresmena irabazteko gogotik eta bokazioz” lan egiteagatik.
Azken ekitaldia, azaroaren 14an
Atzoko ekitaldia Kirol Astearen azken aurrekoa izan zen. Azkena, berriz, azaroaren 14rako iragarri dute. Egun horretan Oiartzungo kirol arloko diagnostikoa ikuspegi feministatik; ondorioen aurkezpena izenburupean azalpenak emango dituzte udaleko kideek. 19:00etan izango da informazio hizketaldia, Landetxen. Ekitaldia doan da, baina aurrez gonbidapenak eskuratu behar dira (egin klik hemen).
