Kendu dute
Antxoko trenbidearen gaineko zubia gaur goizean kendu dute. Barrutiaren itxura urbanoaren ikurretakoa zen.
Argazkia: Fermintxo. Antxo eta portua lotzen zituen zubia gaur goizean kendu dute. Berehalako batean kendu dute zubi gorria, pieza osoa hartu du garabiak, uste baino azkarrago. Pasaiako barrutiaren itxura urbanoaren zati zen pasabide gorria, garai batean maiz erabilia antxotarren eta sanjuandarren partetik, eta azken urteetan utzikerian ahaztua. Segurtasun neurriengatik ezabatu dute barrutiko paisaiatik, zatiak trenbidera erortzen hasiak zirelako.
Zubia herritarrak portura joateko jarri zuten. Zehazki, 1973aren bukaera aldera, Pasaia eta Ingalaterrako Southampton hiria batzen zituen ferrya hasi zen martxan, eta bederatzi hilabete geroago inauguratu zuten ferry horretako bidaiarientzako geltokia edo terminala kaiko Molinao eremuan. Hara iristeko eraiki zuten pasabidea. Askok oroituko dute bertan Ferry izeneko taberna zegoela pasabidearen bukaerako eraikinean. Gainera, pabiloi horren barrualdean Jose Luis Zumeta sortzaile usurbildarraren mural handia zegoen. 1975ko azaroan eten egin zen Pasaia-Southampon konexioa, orduko kronikek diotenez errentagarritasun faltagatik. Zubia, aldi berean, Antxo eta Donibaneko Meipi batzen zituen motoraren erabiltzaileentzako baliagarri izan zen.
1975eko azarotik, askotariko erabilera izan du zubi ondoko eraikinak. Tartean, portuko langileen aldagela ere izan zen. Eraikina 2009ko martxoan eraitsi zuten, baina zubiak bizirauteko aukera izan zuen. Azken urteetan, bertatik batez ere portuko langileak edo barkuetako marinelak joaten ziren hara eta hona. Behobia-Donostia portutik pasatzen zenean ere zabaltzen zuten. Gaurtik, ordea, haizeak lasai egingo du ufa trenbidearen gainetik, oztoporik gabe.
