II. Babarrun Jana, larunbatean, Meipin
Meipiko Jai Batzordeak eta Xantixak bigarrenez antolatu dute jaia. Babarrun jana, bingo solidarioa eta dantzaldi herrikoia izango dira.
Iaz pilotalekuan egin zuten Babarrun Jana. Aurten, Meipiko plazan izango da karpa. 
Elkarren segidako bigarren urtez hartuko du lur Babarrun Janak Meipin, auzoko jai batzordeak eta Xantixa Kultur Elkarteak elkarlanean antolatuta.
Meipiko plaza bihurtuko da ospakizunaren epizentro, bertan ezarriko baitute bazkarirako karpa. Menua, jakina, babarrunak. Hori bai: sakramentu guztiekin. Odolostea, saiheskia, txorizoa eta aza promestu dizkiete antolatzaileek mahaikideei.
Bazkarirako txartelak erosteko epea itxita dago jada, baina gabe gelditu dena antolatzaileekin jar daiteke harremanetan. Bazkalostean bingo solidarioa egingo dute, eta horrekin diren onurak Asociación de afectados por deleción 1p36 elkartearentzat izango dira.
Jaiari jarraipena eta bukaera emateko, musika. Dantzaldi herrikoia egingo dute dj eta barrarekin. Gonbidapen zabala egin diete antolatzaileek bizilagun eta ingurukoei, Meipiko plazara hurbil daitezen.
