Oarsoaldeko bost dantzari, Euskal Herriko V. Aurresku Txapelketarako prest
Igandean Hondarribian jokatuko den txapelketan ordezkaritza zabala izango du eskualdeak. Parte hartuko duten 11 dantzarietatik 5 Oarsoaldekoak izango dira.
Aurresku txapelketako irudi bat. Argazkia: CARRERA Igande honetan (hilak 5) Euskal Herriko V. Aurresku Txapelketa Nagusia jokatuko dute Hondarribian, eta bertan ordezkaritza zabala izango du eskualdeak. Izan ere, Garazi Zabaleta errenteriarra, Mattin Etxebeste oiartzuarra eta Endika Osa, Ane Jaunarena eta Mikel Esnaola lezoarrak bertan izango dira. Orotara 11 dantzari igoko dira Itsas Etxeko auditoriumeko oholtzara. 18:30ean hasiko da lehia.
Lehenengo txandan Aurkez aurke edo Desafioa dantzatu beharko dute, ohiko jantziaz hornituta. Bigarren txandan aldiz, janzkera librea izango da, eta Betronio handia, Ehun dukat edo Graziana dantzatu beharko dute. Azkenik, Zortzikoa eskainiko dute denek.
Irabazleak trofeoa eta txapelaz gain, 400 euroko saria jasoko du. Bigarrenak 300 euro eta hirugarrenak 200 euro jasoko dituzte. Laugarren postutik seigarrenera bitarte sailkatzen direnek ere saria izango dute, 100 euroko dieta emango diete. Azkenik, lehenengo sei postuetan sailkatzen ez diren dantzariek 80 euroko dieta jasoko dute.
Sarrera doakoa izango dela jakinarazi du Gipuzkoako Euskal Dantzarien Biltzarrak.
