Munduko Arrozak festan parte hartzera animatu dute
Hilaren 26an izango da festa, Abarkak antolatuta. Bigarren aldia izango da, eta zazpi herrialdek —gutxienez— presentzia izango dute.
Bigarren aldiz egingo dute Munduko Arrozak jaialdia. Hilaren 26an —hilabeteko azkeneko igandean— Munduko Arrozak jaialdia egingo dute, Oiartzungo Done Eztebe plazan. Iaz izan zen estreinako ekitaldia.
Abarka garapenerako gobernuz kanpoko erakundeak antolatuko du festa, eta ekitaldi “erabat irekia” dela ziurtatu dute. “Jarduera honen bidez, trebetasun sozialen garapena sustatu nahi dugu, hala nola, talde-lana, enpatia, autokonfiantza, motibazioa, kultura desberdinetara sukaldaritzatik hurbilduz”, adierazi dute. Sukaldaritza “hizkuntza unibertsala” dela gaineratu dute.
11:00etan hasiko dira arrozak prestatzen, eta 15:00ak arte pasatu ahal izango da bertatik. Iaz hamalau parte-hartzaile izan zirela gogorarazi dute, eta 300 bisitari.
Aurten —gutxienez— zazpi herrialdetako ordezkariak izango dira arrozak beraien erara prestatzen: Maroko, Pakistan, Frantzia, Sahara, Senegal, Kamerun eta Portugal.
Gainera, Erasmus+ programari buruzko informazio postua jarriko dutela nabarmendu dute, baita merchandising mahai bat ere.
