Salamancara nindoalarik, garaipenean nuen pentsatu... baita ekarri ere
Oiartzungo emakumeen talde nagusiak hiru puntuak lortu ditu urteko bidaiarik luzeenean. Haizeak baldintzatu du partida, baina garaipenak ez du alde egin.
Txiki txikitik abestiak gurasoek Salamancara fraide bidaltzen duten gazte baten abenturak gazi-gozoak kontatzen ditu. Gurasoek ez, baina egutegiaren apetak hala bidalita, Oiartzungo emakumeen futbol talde nagusiak Salamancan jokatu behar izan du asteburuan.
Denboraldiko bidaiarik luzeena izan da, eta desplazamendu luzearen gaziak gozo bilakatu dituzte. Haizeak baldintzatu zuen norgehiagoka, eta oso berdinduta egon zen.
Lizasok lortu zuen partidako gol bakarra, atsedenaldira iritsi baino lehen. Salamancako garaipenak ez ditu oiartzuarrak “Zeruetako giltzari” bilakatu, baina sailkapeneko goialdean jarraitzeko bermea eman die. Bosgarren dira, hamazazpi punturekin, bederatzi partida jokatu ondoren.
Mutilak, bikain
Mutilek ere garaipena lortu dute jardunaldian. Beasainen bisita jaso zuten, eta 10. minuturako aurreratu ziren oiartzuarrak, Mikel Aranbururen bitartez.
Lehen erdia bukatu baino lehen, bigarren gola lortu zuten etxekoek, kontraeraso baten bitartez. Bigarren zatiaren hasieran aldea txikitu zuten goierritarrek, baina partida bukatzeko ordu laurden falta zenean hirugarrena lortu zuten oiartzuarrek, eta partida kontrolpean izan zuten.
Areto futbolean, lehen postura
Lehen taldeak Lauburu Ibarraren kontra jokatu zuen, Elorsoron. Tolosaldekoak lider moduan iritsi ziren Oiartzunera, eta partida gogorra izan zen.
Lehen zatia oso berdinduta egon zen, eta ibartarrak aurreratu ziren. Hala ere, oiartzuarrek berdindu zuten lan erdietara iritsi aurretik.
Bigarren zatiaren hasiera Oiartzuarrek kontrolatu zuten, eta bi gol sartuta, 3 eta 1eko emaitzarekin aurreratu ziren. Azken minutuetan ibartarrek estutu, eta bigarrena lortu zuten, baina ez zen nahikoa izan.
Ondorioz, oiartzuarrek sailkapenean aurrea hartu, eta lider dira orain.
Bigarren taldeari dagokionez, Zarautzen bisita jaso zuen. Ongi aritu ziren oiartzuarrak, eta aldageletara 2-0eko emaitzarekin joan ziren.
Bide beretik joan zen bigarren zatia, eta Elorsorokoek hirugarrena lortu zuten, zarauztarrek ohorearen gola lortu aurretik. Sailkapeneko bigarren postura egin dute salto.
Emakumeen 3. RFEF Maila
- Salamanca UD — Oiartzun: 0-1.
Gizonezkoen Ohorezko Erregional Maila
- Oiartzun — Beasain: 3-1.
Emakumeen Euskal Liga
- Oiartzun B — Alaves: 2-6.
Gizonen Lehen Erregionala
- Beti Ona — Oiartzun B: 2-9.
Emakumeen Ohorezko Erregional Maila
- Tolosa — Oiartzun C: 4-0.
Mutilen Gazte Mailako Euskal Liga
- Arrupe — Oiartzun: 4-3.
Mutilen Gazte Mailako Gorengo Maila
- Oiartzun B — Hondarribia: 1-1.
Mutilen Gazte Mailako Lehen Maila
- Allerru — Oiartzun C: 4-0.
ARETO FUTBOLA
Gizonen Gipuzkoako Kopa
- Oiartzun KE — Lauburu Ibarra: 3-2.
Gizonen Gipuzkoako Bigarren Maila
- Miren Taberna — Zarautz: 3-1.
